Ангелинэ тырэгушхо
Мыекъуапэ илицееу N 19-м щеджэрэ Ангелина Гокунь къыхихыгъэ 3D-моделыр яIэпыIэгъоу хьафизэхэмрэ дэеу зылъэгъухэрэмрэ хьисапымкIэ гъэцэкIэн гъэнэфагъэхэр ашIын алъэкIыщт.
Урысыем икIэлэеджэкIо-инноватор анахь дэгъуи 100-мэ ахалъытэгъэ пшъэшъэ сэнаущым «Артек» щыкIощт Iофтхьабзэу «Инношкольник» зыфиIорэм хэлэжьэнэу заявкэ ытыгъ. Программэу «Инношкольник» икураторхэм ащ фэгъэхьыгъэу къаIотагъ.
«Программэу «Инношкольник» зыфиIорэм ифинал ихьэхэрэр япроектхэмкIэ адрэхэм къахэщых. ПкъыгъуакIэхэр къызэрэхахыхэрэм дакIоу ахэр зыщагъэфедэн алъэкIыщт лъэныкъохэри ныбжьыкIэ сэнаущхэм къагъэнафэх», — къыIуагъ инновациехэмкIэ IэпыIэгъу зэрафэхъухэрэ Фондым иотдел ипащэу Наталья Шуринам.
Мыекъуапэ щыщ кIэлэеджэкIо хъупхъэу Ангелина Гокунь къыхихыгъэ пкъыгъор хьафизэхэмрэ дэеу зылъэгъухэрэмрэ къашъхьэпэщт, Брайль къыхихыгъэ еджакIэр аIэ къырагъэхьанымкIи тренажер фэдэу ар къызфагъэфедэн алъэкIыщт.
Адрэ финалистхэм ягъусэу Ангелинэ чъэпыогъу мазэм ипроект изегъэушъомбгъункIэ амалэу щыIэхэр «Артек» щызэригъэшIэщтых. Урысыем ипредпринимательхэри бизнесмен ныбжьыкIэхэри яопыткIэ кIэлэеджакIохэм къадэгощэщтых. НыбжьыкIэ сэнаущхэм мастер-классхэр афызэхащэщтых, «Суук-Су» зыфиIорэ Дворецым мэфэкI концерт къащафатыщт.