ЗекIоным ылъэныкъокIэ къэралыгъо IэпыIэгъур зэратыщт шъолъырхэр къэнэфагъэх. Ахэм ясатырэ Адыгеир хэт. Къэралыгъо IэпыIэгъум икъыдэхынкIэ зэнэкъокъум шъолъырыр хэлэжьагъ ыкIи ащ фэдэ амал иIэ хъугъэ.

Былымгъот Ибрахьим, АР-м зекIонымрэ зыгъэ­псэфыпIэхэмрэкIэ икомитет ипащ:

— ПстэумкIи зэхэт бюджетым, къэралыгъом ыкIи рес­публикэм, ахъщэ IэпыIэгъоу къатIупщыщтыр сомэ миллиони 198-рэ. Ащ щыщэу процент 99-р къэралыгъо, 1-р республикэ бюджетхэм къарыкIыщт. Арэу зыхъукIэ, сомэ миллиони 198-м щыщэу миллионрэ мин 800-р чIыпIэ бюджетым иIахь. Фэдэ амал тиIэ зэрэхъугъэр АдыгеимкIэ къэгъэлъэгъонышIу, сыда пIомэ тхылъхэр зыгъэпсышъугъэу, ар къыдэзыхышъугъэ шъо­лъырхэр бэ хъухэрэп.

ПстэумкIи мылъку IэпыIэгъур лъэныкъуищмэ афэгъэзэгъэщт. Апэрэр — псыIыгъыпIэхэм къапэIулъ тыгъэзегъэу­пIэхэм ягъэлэжьэн (пляжхэр). Ахэр псыIыгъыпIэхэм, псыуцу­пIэхэм ыкIи псыхъохэм къапыщылъ зыгъэпсэфыпIэхэр ары. Мы лъэныкъомкIэ лажьэ зышIоигъохэр хэдэнхэ алъэкIыщт: тыгъэзегъэупIэр къэралыгъо шапхъэхэм адиштэу ыгъэлэ­жьэщтмэ, ар зекIохэм апае Iэмэ-псымэхэмкIэ зэтригъэ­псыхьащтмэ, сабый джэгупIэ щигъэпсыщтмэ е шхапIэ къыщызэIуихыщтмэ. Фэдэ сатыу­шIыпIэхэм ягъэпсынкIэ сомэ миллионрэ ныкъорэм къыще­гъэжьагъэу миллионипшIым нэ­сэу къэралыгъо IэпыIэгъу сатыушIым ратынэу щыт. ЧIыпIэм «тыгъэзегъэупIэ» цIэр иIэу, тхьапэхэр хабзэм диштэу гъэ­псыгъэнхэ фае.

Былымгъот Ибрахьим:

— НепэкIэ тыгъэзегъэупIэ цIэр зиIэу республикэм итыр къэлэ зыгъэпсэфыпIэм дэт ­зыгъэпскIыпIэ закъор ары. Ау, тызэрэгугъэрэмкIэ, мы лъэныкъомкIэ Адыгеим зиушъомб­гъунымкIэ къэгъэлъэгъонышIухэр иIэх. Ащ фэгъэзагъэу лажьэ зышIоигъохэр щыIэхэмэ зэдгъашIэ зэхъум, ащ фэдэхэр мымакIэу къычIэкIыгъ. Арышъ, ащ зезыгъэушъомбгъу зышIоигъо нэбгырибгъумэ къэралыгъо IэпыIэгъур агъотын алъэ­кIыщт.

ЯтIонэрэр — кемпинговэ унэ­хэр, автокемпингхэр. Мы лъэ­ныкъомкIэ къэралыгъо Iэпы­Iэгъу анахьыбэр сомэ миллиони 4 мин 650-рэ.

Былымгъот Ибрахьим:— Мы лъэныкъор респуб­ли­кэм непэ анахь зыщызыушъомбгъурэмэ ащыщ. Ащ къыдыхэлъы­тэгъэ IэпыIэгъур зэзыгъэгъоты зышIоигъо нэбгырипшIым нахь мымакIэу IэпыIэгъур яттын тлъэ­кIыщт. «Анахьыбэр сомэ мил­лиони 4650-рэ» зытIокIэ къикIырэр а пчъагъэм къыриубытэу исатыушIыпIэкIэ ищыкIагъэм зыкъытфэзыгъазэрэр къы­кIэ­лъэIун зэрилъэкIыщтыр ары.

Ящэнэрэ лъэныкъор илъэсым къыкIоцI Iоф зышIэщт зыгъэпс­кIыпIэхэр Iэмэ-псымэхэмкIэ зэтегъэпсыхьэгъэнхэм, зекIо лъэ­гъо зэфэшъхьафхэм, зекIо къэбарлъыгъэIэс гупчэхэм ягъэ­псын ыкIи мобильнэ приложениехэм якъэугупшысын тегъэ­псыхьагъ.

ШIоигъоныгъэ зиIэхэм IэпыIэгъухэр къызфагъэфедэшъунхэм шэпхъэ гъэнэфагъэхэр пылъых. Проектхэр мы илъэсым ыкIэ нэс агъэцэкIэнхэ фае, къызкIэ­лъэIухэрэ сомэ пчъагъэм ызыныкъо нахь мымакIэу ежь яахъ­щэу мылъку IэпыIэгъум хагъэхъонэу яIэн фае.

Былымгъот Ибрахьим: — ГущыIэм пае, миллиони­пшIыр сатыушIым тэ етэтмэ, миллионитфыр ежьым хигъэ-хъон фае. КъэIогъэн фае, ыгъэ­цэкIэгъэ Iофым ычIыпIэ ахъщэр етымытэу, ар римыгъажьэзэ IэкIэтэгъахьэ. Ау къэралыгъо IэпыIэгъур IумыкIэзэ, илъэсым иублэгъум псэолъэшI IофшIэнхэр ыгъэцэкIагъэхэмэ, ахэмкIэ тхьапэхэр къытехьылIэхэшъ, ежь иахъщэкIэ ышIыгъэу къэтэгъэлъагъо ыкIи ежь иIахьэу хигъэ­хъощтыр нахь макIэ мэхъу. Ащ нэмыкIэу, зыкъытфэзыгъазэрэм чIыгу иIэн фае ежь иунаеу е бэджэндэу. Бэджэндэу ыIыгъмэ, къэралыгъо IэпыIэгъу зыратырэм къыщыублагъэу илъэсищрэ ар ыгъэлэжьэн фае.

Джащ фэдэу IэпыIэгъур зи­щы­кIагъэр аужырэ илъэсныкъом унэе сатыушIэу зэрэщытыр къыу­шыхьатын фае. Зэзэгъыны­гъэу сатыушIым дэтшIыщтым шIокI имыIэу итхэгъэщтхэм ащыщ ипроект зигъэцакIэкIэ зэфэхьысыжьэу къыгъэлъэгъон фаер. Ахэр: илъэсым ыкIэм зы IофшIэпIэ чIыпIэ иIэныр, лэжьапкIэр нахьыбэ шIыгъэныр. Лъэныкъуищым язэу нахь къекIурэр сатыушIэ пэпчъ къыхихын фае.

Къэралыгъо IэпыIэгъум итын­кIэ зэнэкъокъум изэхэщэн ищы­кIэгъэ тхьапэхэм ягъэхьазырын дэлэжьагъэх. Зэнэкъокъур зэха­щагъ, IэпыIэгъум кIэлъэIухэрэм яшIоигъоныгъэхэр къагъэлъэ­гъуагъ. Мы мазэм ахэм зэфэ­хьы­сыжьхэр афашIыщтых ыкIи ахъщэ зэратыщтхэм ацIэхэр къыраIощтых. ПстэумкIи мы къэралыгъо IэпыIэгъум къыдыхэ­лъытагъэу сатыушI 30-м къехъу­мэ IэпыIэгъу афэхъущтых ыкIи илъэсым ыкIэ нэс ахэм япроектхэр агъэцэкIэнхэ фае.

Анцокъо Ирин.