Адыгэ Республикэр загъэпсыгъэр илъэси 100 зыщыхъущтым ипэгъокIэу гъогухэм ыкIи зэхэкIыпIэхэм яшIын епхыгъэ проект ини 3-мэ ягъэцэкIэн аублэгъагъ.

Мы мафэхэм автомобиль гъогоу «Инэм – БжыхьакъоякIэр» зыфиIоу сомэ миллиарди 3-м ехъу зыпэIухьанэу агъэ­нэфагъэм иIэщт гъогу зэхэкIыпIэм ишIын лъагъэкIуатэ. Ащ зэкIэмкIи километри 5,2-рэ икIыхьагъ. Процент 73-м кIахьэу ар гъэцэкIагъэ хъугъэ. 2022-рэ илъэсым чъэпыогъум, Адыгэ Республикэм и Мафэ ехъулIэу IофшIэнхэр къаухыщтых. Джащ фэдэу гъогу псэолъэ инитIум яшIыни чъэпыогъум ыкIэхэм адэжь аухыщт. Ахэр Мыекъуа­пэ къэзыухьэрэ автомобиль гъогур ыкIи Мыекъопэ районым иавтомобиль гъогоу «Черниговская —Дагомыс» зыфиIорэм иIахьэу километри 10 хъурэр.

Ащ нэмыкIэу Росавтодорым зэрезэгъыгъэхэм тетэу республикэм илъэмыдж псэуалъэхэр агъэ­кIэжьых. Мы илъэсым мыщ фэдэ псэолъищым апае сомэ миллиони 169,8-рэ къафатIупщыгъ. Автомобиль гъогухэу «Красногвардейское — Уляп — Зарево» ыкIи «Абадзехская — Новосвободная» зыфиIохэрэм ялъэмыджхэм мы мафэхэм гъэцэкIэжьын IофшIэнхэр ащэкIох. Ащ нэмыкIэу гухэлъэу щыIэхэм ащыщ мэхьанэ зиIэ транспорт зэхэкIыпIэу «Краснодар — Верхнебакинский» зыфиIорэм ия 19-рэ километрэ ишIын.

КIАРЭ Фатим.