Адыгеим ичIыгулэжьхэм бжыхьэсэ лэжьыгъэу халъхьэгъагъэм иIожьын аухыгъ.

ПстэумкIи гектар 105844-рэ яIагъ, тонн мин 478-рэ фэдиз къаугъоижьыгъ. Зы гектарым, гурытымкIэ лъытагъэу, центнер 50,3-рэ къытыгъ. 2021-рэ илъэ­сым а пчъагъэр 47-рэ зэрэхъущтыгъэр.

Бжыхьасэхэм къарахыгъэмкIэ Красногвардейскэ ыкIи Кощхьэблэ районхэм ячIыгулэжьхэр апэ хъугъэх. Ахэм зы гектарым гурытымкIэ центнер 54-м къыщымыкIэу къырахыгъ.

Бжыхьэсэ хьэу республикэм щы­халъхьэ­гъагъэр гектар 12144-рэ хъу­щтыгъ. Ащ изы гектар, гурытымкIэ лъы­тагъэу, центнер 50,4-рэ къырахы­жьыгъ. АщкIэ апэ итых Красногвардейскэ районым ичIыгулэжьхэр. ПстэумкIи ащ фэдэ культурэу гектар 2169-рэ яIагъ, гурытымкIэ центнер 57,4-рэ къы­тыгъ, тонн 12447-рэ къаугъоижьыгъ.

Коцыр гектар 83862-рэ хъущтыгъ, гурытымкIэ центнер 50,4-рэ къырахызэ, тонн мин 421-рэ къаугъоижьыгъ.

Коцым къырахыгъэмкIэ Кощхьэблэ районым ичIыгулэжьхэм пэрытныгъэр аIыгъ. ПстэумкIи коц гектар 14320-рэ яIагъ, зы гектарым центнер 54,2-рэ фэдиз къытыгъ, тонн 77620-рэ къаугъо­ижьыгъ.

Ащ ыуж кIэкIэу итых Красногвардейскэ ыкIи Шэуджэн районхэм ячIыгулэжьхэр. ГурытымкIэ центнер 53-м ехъу район пэпчъ къыщырахыгъ. Красногвардейскэ районым тонн 61280-рэ, Шэуджэн районым 76877-рэ къаугъоижьыгъ.

Лэжьыгъэ чылапхъэ ашIынэу рапс гектар 10491-рэ пстэумкIи республикэм щыхалъхьэгъагъ. Ари Iуахыжьыгъ. ГурытымкIэ лъытагъэу, ащ центнер 28-рэ къытыгъ, тонн 29687-рэ къырахыгъ.

Тритикалеу Джэджэ, Мыекъопэ, Тэхъу­тэмыкъое ыкIи Мыекъопэ районхэм ащыхалъхьэгъагъэм иIухыжьыни аухыгъ. Къаугъоижьыгъэр тонн 1570-рэ мэхъу.

ХЪУТ Нэфсэт.