Адыгэ Республикэм и ЛIышъхьэу КъумпIыл Мурат Херсонскэ хэкум и Геническэ район къикIыгъэ кIэлэцIыкIухэу Адыгеим зыщызыгъэпсэфыхэрэм зэрищыкIагъэм фэдэу анаIэ атырагъэтынэу къафигъэпытагъ.

Мы мафэхэм Адыгеим изыгъэпсэфыпIэ лагерьхэу «Горный» ыкIи «Лань» зыфиIохэрэм Херсонскэ хэкум къикIыгъэ кIэлэцIыкIухэм зыщагъэпсэфы. Джырэблагъэ ахэм адэжь еблэгъагъэх АР-м IофшIэнымкIэ ыкIи социальнэ хэхъоныгъэхэмкIэ иминистрэу Мырзэ Джанбэчрэ АР-м физическэ культурэмрэ спортымрэкIэ иминистрэу Дэгужъые Муратрэ.

— ЛагеритIуми зэхэтэу кIэ­лэцIыкIу 495-мэ защагъэпсэ­фы, ахэм нэбгырэ 19 нахьы­жъэу ягъусэх. Япсауныгъэ изытет тыкIэупчIагъ, сыда пIомэ Адыгеим къэкIонхэм фэшI чэщ-зымафэрэ ахэр гъогу тетыгъэх. КIэлэцIыкIухэри, нахьыжъхэри лагерым щыIэкIэ амалэу щыряIэм егъэразэх, агу рехьы. Лагерьхэм зыпкъ итэу Iоф ашIэ. Тэ пшъэрылъэу тиIэр Геническэ районым къикIыгъэ кIэлэцIыкIухэм республикэм ичIыпIэ дахэхэр ядгъэлъэгъунхэр, шIуагъэ къытэу языгъэ­псэфыгъо уахътэ агъэкIонымкIэ тишIуагъэ ядгъэкIыныр ары, — къыIуагъ Мырзэ Джанбэч.

Джащ фэдэу министрэм къы­зэриIуагъэмкIэ, лагерь пэпчъ Iоф зэришIэщт программэ иI. Iофтхьабзэхэм язэхэщэн тишъо­лъыр культурэмкIэ и Министерствэ, Адыгеим физическэ культурэмкIэ ыкIи спортымкIэ и Комитет, АР-м гъэсэныгъэмкIэ ыкIи шIэныгъэмкIэ и Министерствэ къыхагъэлэжьэщтых. Джащ фэдэу муниципальнэ ыкIи республикэ творческэ коллективхэр къырагъэблэгъэщтых.

Лагерэу «Горнэм» боксер ыкIи футболист ныбжьыкIэхэм зыщагъэпсэфы. АР-м физическэ культурэмкIэ ыкIи спортымкIэ и Комитет итхьаматэ ахэр ыгъэ­гугъагъэх тренировкэхэр ашIынхэмкIэ ишIуагъэ аригъэ­кIынэу ыкIи ахэм ащыгъыщтхэр аратынхэу.

Геническэ районым къикIыгъэ кIэлэцIыкIухэр Адыгеим зыщагъэпсэфыныр зигукъэкIыр Адыгеим и ЛIышъхь ары. Зызэрагъэпсэфырэм имызакъоу, япсауныгъэ агъэпытэн алъэ­кIынэу, зэрищыкIагъэм фэдэу яфэIо-фашIэхэр агъэцэкIэнхэу КъумпIыл Мурат афигъэпытагъ.

ЗэкIэмкIи мэфэ 21-рэ кIэлэцIыкIухэм Адыгеим зыщагъэпсэфыщт. Политическэ партиеу «Единэ Россием» ишIухьафтынхэр ахэм къяжэх.

КIАРЭ Фатим.