Гурыт еджапIэхэм ягъэцэкIэжьын фэгъэхьыгъэ программэр Адыгеим чанэу щызэшIуахы. Ар зигукъэкIыр партиеу «Единая Россия» зыфиIорэр ары, УФ-м и Президент ащ дыригъэштагъ.

АР-м гъэсэныгъэмрэ шIэныгъэмрэкIэ иминистрэ ипшъэрылъхэр зыгъэцэкIэрэ Евгений Лебедевым къызэриIуагъэмкIэ, мы илъэсым республикэм ит гурыт еджэпIи 10-мэ гъэцэкIэжьын игъэкIотыгъэхэр ащэкIох. Зэрагъэнэфагъэм тетэу IофшIэнхэр чанэу зэшIуахых, непэрэ мафэм ехъулIэу гурыт еджапIэхэм акIоцI зэтырагъэпсыхьажьыгъ. ДжырэкIэ къэкIорэ илъэсым агъэкIэжьыщт еджапIэхэр атхых, 2023-рэ илъэсым джыри гурыт еджэпIи 7 зэтырагъэ­псыхьажьыщт.

IофшIэнхэр игъом ыкIи зэрифэшъуашэу зэрагъэцэкIэщтхэм дакIоу гурыт еджапIэхэр зыдэт щагухэр зэтырагъэпсыхьанхэу, тэрэзэу къа­шIыхьанхэу ыкIи къагъэнэфынхэу АР-м и ЛIышъхьэу КъумпIыл Мурат пшъэрылъ афигъэ­уцугъ.

Сурэтым итыр: Мыекъопэ гурыт еджапIэу N 22-м гъэцэкIэжьын IофшIэнхэр щэкIох.

Тезыхыгъэр Iэшъынэ Аслъан.