НыбжьыкIэ сэнаущхэм язэхахьэу «Фыщт» зыфиIорэр коронавирусым ыпкъ къикIыкIэ илъэси 2 зэха­щэнэу хъугъэп. Джы мыгъэ, ыпэкIэ зэрэщытыгъэм фэдэу, Фыщт икъушъхьэлъапэ дэжь ар щыкIощт.

Шъолъыр зэфэшъхьафхэм яныбжьыкIэхэр ащ къекIолIэщтых. Адыгеим истудент сэнаущхэм анэмыкIэу, Къэбэр­тэе-Бэлъкъарми, Къэрэщэе-Щэр­джэс­ми, Краснодар крайми ястудентхэр ныбжьыкIэ форумым зэфищэщтых. Шышъхьэ­Iум и 12-м къыщегъэжьагъэу и 14-м нэс кIощт слетым ныб­жьыкIэ нэбгырэ 300-м ехъу хэлэжьэщт.

АР-м гъэсэныгъэмрэ шIэныгъэмрэкIэ иминистрэ ипшъэ­рылъхэр зыгъэцэкIэрэ Евгений Лебедевым къызэриIуагъэмкIэ, мыгъэ культурэ, спортивнэ, зе­кIон, экологие Iофтхьабзэхэр ары анахьэу зэрахьащтхэр. Творческэ коллективхэм тематическэ площадкэхэм закъы­щагъэлъэгъощт, муниципалитетхэмрэ республикэм иапшъэрэ еджапIэхэмрэ лъэтегъэуцохэр, спорт зэнэкъокъухэр, экскур­сиехэр, экологие, просветительскэ Iофтхьабзэхэр зэхащэщтых.

СлетымкIэ хъугъэ-шIэгъэ шъхьа­Iэу щытыщтыр Адыгеим и ЛIышъхьэ ныбжьыкIэхэм зэраIукIэщтыр ары. Пхъэ машIом кIэлъырысхэу ныбжьыкIэхэр КъумпIыл Мурат гущыIэгъу фэхъущтых. — Адыгеим иныбжьыкIэхэмрэ икIэлэцIыкIухэмрэ шэпхъэшIухэм адиштэрэ гъэсэныгъэ агъотыным, шIэныгъэм, ­спортым, искусствэм ыкIи нэмыкI лъэныкъохэм икъу фэдизэу закъы­щагъэлъэ­гъоным апае ящыкIагъэр ядгъэгъотыным тыпылъ. Мыщ дэжьым мэхьанэшхо иI ежьхэри къыддэгощэнхэм — ­зы­гъэ­гумэкIыхэрэм, къыра­хьы­жьэрэ IофыгъохэмкIэ тызэра­дэIэпыIэшъущтым тыща­гъэгъо­зэным. «Фыщт» зыфиIорэ зэхахьэр анахь ашIогъэшIэгъонэу, шъхьадж игумэкIыгъохэмрэ игу­къэ­кI­хэмрэ къызэрихьылIэхэу, джэуапхэр, гупшысэгъухэр къыз­щигъотыхэу щытхэм ащыщ, — къы­Iуагъ КъумпIыл Мурат.

Илъэс заулэкIэ узэкIэIэбэжьмэ, слетым хэлэжьагъэх ныбжьыкIэ сэнаущхэу Адыгэкъалэ щыщэу ЩэшIэ Альберт, Кощ­хьэблэ районым къикIыгъэхэ Хьашхъо Данэрэ Чэтэо Аминэрэ, Мыекъуапэ щыпсэоу Къуижъ Бислъан. Мыхэр республикэм ыцIэ дахэкIэ рязыгъэIогъэ ныбжьыкIэх. ЕджапIэм дэгъоу зэ­рэ­щеджагъэхэм имызакъоу, спортымкIэ гъэхъагъэхэр яIэх, бизнесым пылъхэри ахэтых. ТапэкIи гъэхъагъэу яIэхэм зэра­хагъэхъощтым, къызщыхъу­гъэ­хэ республикэр дахэкIэ къы­зэра­гъэлъэгъощтым тицыхьэ телъ.

Спортым, культурэм, гъэсэныгъэм, нэмыкI лъэныкъохэмкIэ къахэщыгъэ ныбжьыкIэхэм рес­публикэм ипащэ ынаIэ атыригъэтын, ыгъэшIонхэ гухэлъ иIэу мы Iофтхьабзэр зэхещэ. Мы чIыпIэри КъумпIыл Мурат къы­хэзыхыгъэр. НыбжьыкIэу Iоф­тхьабзэм къырагъэблэгъэщтхэм ягъэнэфэн яшъыпкъэу Iоф да­шIэ. Республикэм иныбжьыкIэ­хэм шIэныгъэу аIэкIэлъым, гъэ­хъагъэу яIэхэм тапэкIи аха­гъэхъоным Адыгеим ипащэ чанэу дэлажьэ.

КIАРЭ Фатим.