Къэзэнэ МулиIэт лъэпкъым ихъарзынэщ фэлэжьэрэ цIыф. Илъэс пчъагъэхэм гуетыныгъэшхо хэлъэу, фэшъыпкъэу лъэпкъ тарихъыр ащ кIеугъуае. ЦIыф цIэрыIоу тиIэхэр арыми, Адыгеим къырыкIогъэ хъугъэ-шIагъэхэр арыми, ахэм афэгъэхьыгъэ тарихъ тхыгъэхэр, шыхьатхэр уищыкIагъэу узеуалIэрэм, хэшIыкI ин фыриIэу къыбдэIэпыIэщт, ишIуагъэ къыуигъэкIыщт.

Сэ сшъхьэкIэ МулиIэт нэIуасэ сызфэхъугъэр Адыгэ къэралыгъо университетым сыщеджэ зэхъу лъэхъаныр арыгъэ. Ащыгъум ар Адыгэ хэку тхылъеджапIэу А. Пушкиным ыцIэ зыхьырэм иIофышIэу щытыгъ ыкIи ныбжьы­кIэ адыгэ хьакIэщхэм язэхэщакIощтыгъ. А лъэхъаным Мулэ (ары тызэреджэщтыгъэр) ныбжьыкIэхэм языгъэпсэфыгъо уахътэ нахь гъэшIэгъонэу зэхэщэгъэным, нахь зэрэшIэнхэм, IэкIыбым къикIыхэу къытхэхьа­жьырэ тилъэпкъэгъухэр хэкум нахь шIэхэу хэгъозэжьынхэм, адыгэ хьакIэщым икультурэ зыкъыригъэIэтыжьыным, тищыIэныгъэ къыхэгъэуцожьыгъэным фэщагъэу ауж итыгъ, Iоф ади­шIэщтыгъэу пIоми нахь тэрэз. Мулэ ныбжьыкIэ чанхэр къыгоуцощтыгъэх, ахэр иIэпыIэгъоу лъэпкъ Iофтхьэбзэ дахэу зэхищэщтыгъэхэр къыдэхъущтыгъэх.

КъэсэшIэжьы Адыгэ Респуб­ликэм и Лъэпкъ театрэу Цэй Ибрахьимэ ыцIэ зыхьырэм иятIонэрэ къат тет холлым щы­кIощтыгъэ адыгэ хьакIэщхэр Мулэ зэрэзэрищэщтыгъэхэр. Ау сыдми ныбжьыкIэхэм язэхэхьэпIэ къодыеу щымытэу, адыгэ джэгукIэхэр, зэнэкъокъухэр хи­гъахьэщтыгъэх, къэбарIуатэ­хэр, пщынэо IэпэIасэхэр хэтэу ахэр гъэшIэгъонэу кIощтыгъэх. КъыкIэлъыкIорэ зэIукIэгъур къытфэмыгъэсыжьэу, тшIогъэшIэгъонэу ащ тыкIощтыгъэ, кIэух джэгоу щашIыщтыгъэми тигуапэу тыхэлажьэщтыгъ. Мулэ нэшIо— гушIоу, нэутхэу, къэIокIэ-шIыкIэ гохьыхэр къызкъуихэу, адыгэ хьакIэщым ибысымгощэ шъыпкъэу пчэгум итыщтыгъ. ТшIочанэу, тшIохъупхъэу ащ тыкIырыплъыщтыгъ.

Джащ фэдэу Къэзэнэ МулиIэт ыцIэ епхыгъэ шъыпкъэу зигугъу къэпшIын фаеу слъытэрэр цIыф цIэрыIоу лъэпкъым хэтхэм яхъар­зынэщ иугъоин иIахьышIу зэрэхилъхьагъэр ары. Ахэм ащыщых, гущыIэм пае, Адыгэ Республикэм иапэрэ Президен­тэу Джарымэ Аслъан, РСФСР-м изаслуженнэ, Адыгэ Республи­кэм инароднэ артистэу Шъэожъ Розэ, РСФСР-м искусствэхэмкIэ изаслуженнэ IофышIэшхоу, Адыгэ Республикэм инароднэ артистэу Ахэджэго Мэджыдэ, Адыгэ Республикэм илъэпкъ тхакIоу Еутых Аскэр афэгъэхьыгъэхэр.

Къэзэнэ МулиIэт игукъэкIыкIэ хъарзынэщым икъэкIуапIэу щыт организациехэм япчъагъэ Адыгэ Республикэм илIыкIо гъэIоры­шIапIэу Урысые Федерацием и Президент дэжь щыIэр, АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамал­хэмкIэ и Комитет, Адыгэ Рес­публикэм икультурнэ кIэн икъэ­ухъумэнкIэ, игъэфедэнкIэ ГъэIо­рышIапIэр, Къэралыгъо академическэ къэшъокIо ансамблэу «Налмэсыр», Хьанэхъу Адам ыцIэ зыхьырэ Камернэ музыкальнэ театрэр, Адыгэ Респуб­ликэм итхылъ тедзапIэ, Адыгэ Республикэм иобщественнэ движениеу «Адыгэ Хасэр», нэмыкIхэри хигъэхьагъэх. Къэралыгъо телерадиокомпаниеу «Адыгеир» ахэм зэу ащыщэу зэрилъытэрэр, хъарзынэщым иугъоинкIэ тызэрэзэдэлэжьэн фаер, непэрэ мафэхэм ятарихъ мытхыгъэ Адыгэ радиом ыкIи телевидением якъэтынхэм къы­зэ­рапкъырыкIырэр, тихъарзынэщ уасэ зиIэхэм зэу зэращыщыр тизэIукIэгъухэм Мулэ тынаIэ ащытырегъэты. Лъэпкъ хъарзы­нэщым тэри тиIофшIэнкIэ мызэу мытIоу зыфэтэгъазэ, тызэдэлажьэ.

Сыгу къэкIыжьырэмэ ащыщ илъэс заулэкIэ узэкIэIэбэжьмэ, Къэралыгъо телерадиокомпаниеу «Адыгеир» зызэхащагъэр илъэс 25-рэ зэхъум, мэфэкI зэ­хахьэу тиIофшIэгъухэм апае телерадиокомпаниер зычIэт унэм щызэхащэгъагъэм МулиIэт къызэрэрихьылIэгъагъэр. ГущыIэ дахэхэр ыгу пыкIэу ащ тиIоф­шIэгъухэм афигъэзэгъагъ, тиIоф­шIэн мэхьанэу иIэр къыIэтэу, лъэпкъым итхыдэIуатэу журналистхэр зэрэщытхэр къыхигъэу­нэфыкIыгъагъ, гъэхъагъэ хэлъэу тапэкIи тылэ­жьэнэу къытфэхъо­хъугъ.

Къэзэнэ МулиIэт непэ Адыгэ Республикэм хъарзынэщ Iоф­хэмкIэ и ГъэIорышIапIэ иупчIэ­жьэгъу шъхьаI. ИIофшIэн фэ­шъып­­къэу, фэщагъэу илъэс пчъагъэм егъэцакIэ, гъэхъагъэ­хэр ешIых. ШышъхьэIум и 8-р МулиIэт къызыхъугъэ маф. АщкIэ тыфэгушIо, псауныгъэ пытэ иIэнэу, зыщыгушIукIэу янэ гъэшIэ кIыхьэ хъунэу, ащ ижьау бэрэ чIэтынэу, иIахьыл-гупсэхэр къыщыгушху­кIыхэу, шIу ылъэгъурэ Iофым гухахъо хигъуатэу псэунэу фэтэIо!

Тэу Замир.