Лъэпкъ проектэу «Щынэгъончъэ ыкIи шэпхъэшIухэм адиштэрэ гъогухэр» зыфиIорэм Мыекъопэ районым гъогу километрэ 11,7-рэ мы илъэсым щагъэцэкIэжьынэу къыщыдэлъытагъ.

Поселкэу Тимирязевым екIу­рэ автомобиль гъогум иIахьэу километри 2,3-рэ, Краснооктябрьскэм икIэу поселкэу Къу­жъыпс зэпичызэ Дагестанскэм кIорэм щыщэу километри 3 ыкIи къутырэу Косиновэм иавтомобиль гъогу километри 2,36-рэ агъэкIэжьыгъах. Ахэр къэкIощт 2023-рэ илъэсымкIэ агъэнэфагъэхэм ахэтыгъэх. ПстэумкIи федеральнэ ыкIи республикэ бюджетхэм къахэхыгъэу сомэ миллиони 108,5-рэ апэIухьагъ.

Шъолъыр мэхьанэ зиIэ автомо­биль гъогоу станицэу Кужорскэм екIурэр «Шэуджэн ДРСУ-р» ары зыгъэцэкIэжьырэр. Ащи IофшIэнхэр гъунэм рифылIагъэх. Гъогу Iахьыр метрэ 700 ныIэп зэрэ­хъурэр, ау гъогурыкIоныр щынэгъончъэнымкIэ мэхьанэшхо иI. Федеральнэ шапхъэхэм адиштэу ар ашIыжьы.

«Адыгеяавтодорым» IофшIэнхэр зэрэкIорэм лъэшэу ынаIэ тет, асфальтэу тыралъхьэрэм идэгъугъэ, температурэу ищыкIагъэр, нэмыкI шапхъэу проектым къыщыдэлъытагъэхэр зэрагъэцакIэхэрэми лъэплъэ.

Техникэ зэфэшъхьафэу 8 подрядчикым ащ щегъэфедэ. Автомашинэхэр зэрыкIохэрэр аухымэ, гъогурыкIоным ищыкIэгъэ зэхэутынхэр ашIыщтых, гъогу гъунэхэр зэрагъэфэщтых. Гъогу IофшIэнхэр зыщыкIохэрэм ащысакъынхэу водительхэм тыкъяджэ!