Республикэу Беларусь къикIыгъэу Адыгеим къэкIогъэгъэ лIыкIо купыр блэкIыгъэ тхьамафэм зыдэщыIэгъэ хъызмэтшIапIэхэм ащыщ Мыекъопэ редукторышI заводэу «ЗАРЕМ» зыфиIорэр. Адыгеим ылъэныкъокIэ ахэм ягъусагъ экономикэ хэхъоныгъэхэмкIэ ыкIи сатыумкIэ министрэу Шэуджэн Заур.

ХъызмэтшIапIэм ипащэу Бэгъушъэ Руслъан продукциеу къыдагъэкIырэм, лъэхъаным диштэрэ шIыкIэ зэфэшъхьафэу агъэфедэхэрэм нэIуасэ афишIыгъэх. Ащ къызэриIуагъэмкIэ, Беларусь зэпхыныгъэ дыряIэу, чугуным хэшIыкIыгъэ пкъыгъоу ящыкIагъэхэр къыращых.

— Подшипникхэм япхыгъэу тапэкIэ гумэкIыгъохэр щыIэ хъущтых, — къыIуагъ хъызмэт­шIапIэм ипащэ. — Непэ ти­щыкIагъэм фэдиз тиI, ау санкциеу къэралыгъом къыпагъохыгъэхэм Iофыгъоу къыздахьыхэрэр къыдэплъытэхэмэ, неущырэ мафэр зэрэхъущтыр къэшIэ­гъуае мэхъу. Подшипникхэр зыщашIырэ заводэу къалэу Самарэ дэ­тым къыщытщэфы хабзэ, ау тэ тызэрэфаеу комплект шIыгъэу ащ щыдгъотыжьыщтэп. Китаим къыщыдэзыгъэкIыхэрэм занкIэу зэпхыныгъэ адэпшIынышъ, къа­щыпщэфыныр къин.

Беларусь зэпхыныгъэу хъыз­мэтшIапIэм дыриIэм зегъэу­шъомбгъугъэнымкIэ ыкIи шарикоподшипниковэ заводэу Минскэ дэтым къыдигъэкIыхэрэр къызIэкIагъэхьанымкIэ IэпыIэгъу къафэхъунхэу ащ къикIыгъэ лIы­кIо купым хэтхэм къагъэгугъагъэх.

Мыекъопэ редукторышI заводэу «ЗАРЕМ» зыфиIорэр зы­щыIэр илъэс 45-м ехъугъ. Промышленностым илъэныкъо зэфэшъхьафхэм ащагъэфедэрэ редукторхэр ащ къыщыдагъэ­кIых, япродукцие ямышIыкIэу, зыми фэмыдэу гъэпсыгъэ. Уахъ­тэм зэхъокIыныгъэу къызди­хьыхэрэм адиштэу технологие пэрытыр агъэфедэ, ащ ищы­кIэгъэ оборудованиери, иIоф­шIэн хэшIыкIышхо фызиIэ спе­циалистхэри яIэх. ШIыкIакIэхэр игъом ыкIи икъоу зэрагъэфе­дэхэрэм ишIуагъэкIэ, дунэе шапхъэхэм адиштэу Iоф ашIэн амал яIэ хъугъэ.

Бэгъушъэ Руслъан къызэри­IуагъэмкIэ, продукцие зэфэ­шъхьафэу 200 фэдиз къашIын алъэкIыщтхэм яспискэ хэт. Мэ­шIокугъогу отраслэм, мэ­къу­мэщ хъызмэтым, металлургием, энергетикэм, гъомылэпхъэ­шIыным, нэмыкIхэм ящыкIэгъэ ре­дукторхэр къыдагъэкIых. Непэ заказэу къатыгъэм тетэу, техническэ пшъэрылъ гъэнэфагъэу къафашIырэр къыдалъытэзэ Iоф ашIэ. Урысыем ыкIи СНГ-м икъэралыгъохэм яхъызмэтшIапIэхэм ащыщыбэм зэпхыныгъэ адыряI.

Къэралыгъом IэпыIэгъоу къы­тырэ пстэур чанэу агъэфедэ. Ащ ишIуагъэкIэ лъэхъаным ди­штэрэ оборудование дэгъоу амалыбэ къэзытыхэрэмкIэ Iоф ашIэн алъэкIы.

Нэужым Мыекъопэ маши­нэшI заводым Беларусь къикIыгъэ хьакIэхэр ащэгъагъэх. Пхъэм ыкIи гъучIым ахэшIыкIыгъэ пкъыгъохэм якъыдэгъэкIын щагъэфедэрэ гидроманипулятор-хэр ащ къыщашIых. Лъэхъаным шIыкIакIэу къыздихьыхэрэр, ащ ищIыкIэгъэ оборудованиер ­игъом зэрагъэфедэхэрэм ишIуа­гъэкIэ илъэсыбэ хъугъэу бэ­дзэршIыпIэм чIыпIэ гъэнэфагъэ хъызмэтшIапIэм щыриI.

Джащ фэдэу IэкIыбым къырамыщэу тихэгъэгу къыщашIыгъэхэр гъэфедэгъэнхэм лъэшэу пылъых, Урысыем ишъолъырхэм зэкIэми яманипуляторхэр ащагъэфедэ хъугъэ.

ХьакIэхэм цеххэр къарагъэ­кIухьагъэх, шIыкIэу агъэфедэ­хэрэм нэIуасэ афашIыгъэх.

Мыекъопэ пивэшI заводыр Адыгеим ихъызмэтшIэпIэ ана­хьыжъхэм ащыщ, ау лъэхъанэу зыхахьэрэм къыздихьырэ шIыкIэхэр апэу ыгъэфедэнэу езыгъажьэхэрэм, илъэс къэс пIоми хъунэу, хэхъоныгъэшхохэр зы­шIыхэрэм ясатырэ хэт. Ащи Бе­ларусь къикIыгъэ лIыкIо купыр рагъэблэгъагъ.

Алкоголь макIэу зыхэлъ продукцием илъэпкъ зэфэшъхьафэу къашIыхэрэм ямызакъоу, ар зыхэмылъыхэхэри къыдагъэкIых. ХъызмэтшIапIэм ипащэу Юрий Горносталевым къызэриIуа­гъэмкIэ, ащ имызакъоу, «пивная дробина» зыфаIоу пцэжъыехэмрэ былымхэмрэ ашхырэмэ ахалъхьэрэр къэзышIырэ обору­дование къащэфыгъ. Джы зыпари пыдзафэ ямыIэу Iоф ашIэ. ЛIэшIэгъурэ ныкъорэкIэ узэ­кIэIэбэжьмэ агъэуцугъэгъэ цех­хэм чырбыщ зэтелъхьакIэу, кIашъохэм яшIыкIэу, нэмыкIэу ащагъэфедэгъагъэхэр къызэрэзэтырагъэнэжьыгъэхэм, оборудованиякIэу къежьэрэр агъэуцу­ным пайи ахэр непэ къызнэсыгъэм зэрэзэщамыгъакъохэрэм рыгушхоу пащэм къыхигъэщыгъ.

ХьакIэхэм шъонхэр зыщагъэ­жъорэ, ахэр ягъо мэхъуфэкIэ зыщаIыгърэ цеххэр арагъэлъэгъугъэх, шIыкIэу агъэфедэхэрэр къафаIотагъ. Юрий Горносталевым къызэриIуагъэмкIэ, шъонэу къашIыхэрэм ахалъхьащтыр, зэкI пIоми хъунэу, Урысыем ичIыпIэ зэфэшъхьафхэм къащащэфы. Хмелыр ары Германием къыращырэр, ау ащкIи зыпари Iофы­гъо яIэп. Арышъ, Урысыем къыпагъохыгъэ санкциехэм яягъэ мы заводым къырагъэкIын алъэкIыщтэп.

Беларусь къикIыгъэ хьакIэхэм алъэгъугъэм ыкIи зэхахыгъэм осэ ин къыфашIыгъ, республикитIум яхъызмэтшIапIэхэм Iоф зэдашIэмэ бгъуитIумкIи федэ­шхо зэрэхъущтым яцыхьэ зэрэтелъым къыкIагъэтхъыгъ.

ХЪУТ Нэфсэт. Сурэтхэр Iэшъынэ Аслъан тырихыгъэх.