Джэджэ районым ипсэупIэу Къэлэрмэз культурэм и Унэ щагъэцэкIэжьы.

Хэгъэгум илъэпкъ проектэу «Куль­турэм» хэхьэрэ Iофтхьабзэр рагъэжьагъ. Федеральнэ, респуб­ликэ, чIыпIэ бюджетхэм къахахыгъэ сомэ миллион 19 фэдиз гъэцэкIэжьын IофшIэнхэм апаIуагъэ­хьащт.

— Электроэнергием, псым, фэба­пIэхэм, дэпкъхэр гъэкIэжьыгъэнхэм, фэшъхьафхэм япхыгъэ Iофхэр лъа­гъэ­кIуатэх. Щынэгъончъагъэм фэгъэхьыгъэхэри шапхъэхэм адиштэхэу зэшIуахых, — къыIуагъ Джэджэ районым иадминистрацие ипащэ игуа­дзэу, районым культурэмкIэ и ГъэIорышIапIэ ипащэу Вера Ермак.

Адыгэ Республикэм культурэмкIэ иминистрэу Аулъэ Юрэрэ Джэджэ районым иадминистрацие ипащэу Андрей Та­ранухинымрэ культурэм и Унэ зэрагъэцэкIэжьырэм, псэо­лъэшIхэм яупчIэхэм нахь куоу за­ща­гъэгъозагъ.

— Уахътэу афэдгъэнэфагъэм ыпэ итхэу IофшIэнхэр агъэцакIэх, — къыIуагъ Андрей Таранухиным. — Унэм ыкIоцIи, итеплъи зэхъокIыныгъэу афэхъухэрэр цIыфхэм шIэ­хэу алъэгъущтых. 2022-рэ илъэсым Iоныгъом и 30-м ехъулIэу гъэцэкIэжьын Iоф­шIэнхэр аухынхэ ямурад. Культурэм и Унэ зашIыгъэм къыщегъэ­жьагъэу зыкIи игъэкIотыгъэу агъэ­цэ­кIэжьыгъэп. Унэм имызакъоу, чIы­­пIэу зыдэщытри зэтырагъэпсы­хьащт, зыгъэпсэфыпIэ дахэхэм ащыщ хъущт.

Мыгъэ Урысыем щыпсэурэ лъэпкъ­хэм яискусствэрэ якультурнэ кIэнрэ я Илъэс. ЩыIэныгъэм зэхъокIыныгъэу фэхъухэрэм тагъэ­гушIо. Культурэм иунэхэр зэрагъэ­кIэжьыхэрэм дакIоу, ансамблэхэр, театрэхэр кIэу ащызэхащэх, пIуныгъэ Iофхэр агъэцакIэх.