Адыгеим и ЛIышъхьэу КъумпIыл Мурат республикэм игъогухэм язегъэушъомбгъун зыщы­тегущыIэгъэхэ зэIукIэр тыгъуасэ зэрищагъ. Гъо­гухэмкIэ ГъэIорышIапIэу «Черноморье» зыфиIорэм ипащэу Виктор Вовк пэIудзыгъэ шIыкIэм тетэу ащ хэлэжьагъ.

«Мы аужырэ илъэсхэм федеральнэ гупчэм къытитыгъэ IэпыIэгъум ишIуагъэкIэ рес­публикэм итранспорт инфраструктурэ изегъэушъомбгъункIэ бэ тшIагъэр. Гъогухэм ягъэ­цэкIэжьынрэ ягъэпсынрэ мылъкушхо апэIохьэ. Графикым ыпэ итэу псэолъабэ дгъэпсын тэ­лъэкIы, ау гъэхъагъэу тиIэхэм такъыщыуцурэп. Республикэм игъогухэм язытет нахьышIу шIыгъэным фэшI джыри бэ зэшIотхын фаеу тапэ илъыр.

Ащ пае проектыкIэхэмрэ шъо­лъыр, муниципальнэ гъогухэм ягъэцэкIэжьынрэ лъэшэу тынаIэ атедгъэтын, къулыкъу пстэуми шIуагъэ къытэу тадэлэжьэн фае», — къыIуагъ КъумпIыл Мурат. Виктор Вовк зэрэхигъэу­нэфыкIыгъэмкIэ, гъогухэмкIэ Гъэ­IорышIапIэу «Черноморье» зы­фиIорэм джыдэдэм проектышхо заулэмэ Iоф адешIэ. Федеральнэ гъогоу А-160-м (Мыекъуапэ — Бжъэдыгъухьаблэ — Адыгэкъалэ — Усть-Лабинскэ — Кореновскэ зэзыпхырэм) шъолъыриплIым нэсэу зегъэушъомбгъугъэнымкIэ документхэм ягъэхьазырын ыуж итых.

Федеральнэ автомобиль гъо­гоу А-160-м игъэцэкIэжьынкIэ чIыпIиплIмэ ахэхьэрэ чIыгу Iахьи 10 заул IофшIэнхэр зыщыухыгъэнхэ фаеу къэнагъэр. Ащ ыужкIэ псэуалъэхэм япроектированиекIэ IофшIэнхэр лъагъэкIотэн алъэкIыщт. ЧIыпIэ заулэхэм шъолъыриплIым нэсэу гъогухэм защягъэу­шъомбгъугъэнымкIэ IофшIэны­шхохэр ащызэхэщэгъэнхэу ра­хъухьэ.

Мэхьанэшхо зиIэ проектхэм зэу ащыщ ЧIыбый каналым дэжь автомобиль гъогоу А-146-м гъогу зэхэкIыпIэ щыгъэпсыгъэныр. 2022-рэ илъэсым ия 4-рэ квартал IофшIэныр рагъэжьэнэу рахъухьэ. IэрышI псэолъитф, мэшIоку гъогухэр зэзыпхыщт лъэмыджэу метрэ 800 фэдиз зикIыхьэгъэщтыр ащ хэхьащтых. Скоростым къыщамыгъакIэу автомобилыбэ зыщызекIорэ чIыпIэхэр ащ ишIуагъэкIэ зэпачын алъэкIыщт, укъэбзалъэу тетыщтхэри, фэжъу макъэхэм цIыфхэр ащызыухъумэрэ пкъыгъохэри чIыопсым изытет на­хьышIу шIыгъэным фэIорышIэщтых.

«Проектхэр зэхагъэуцохэ зы­хъукIэ чIыгу Iахьхэмрэ мылъкумрэ япхыгъэ Iофыгъохэр му­ниципальнэ образованиехэм яадминистрациехэм ягъусэхэу зэшIуахых», — къыIуагъ Виктор Вовк.

Гъогум епхыгъэ проектхэм ягъэцэкIэн пае ведомствэхэм зэдэлэжьэныгъэ пытэ зэдыря­Iэным мэхьанэшхо зэриIэр Адыгеим и ЛIышъхьэ къыхигъэ­щыгъ, гъогухэр щынэгъончъэнхэмкIэ ахэм яшIогъэшхо къызэрэкIорэр хигъэунэфыкIыгъ. КъумпIыл Мурат пшъэрылъ афишIыгъ чIыпIэрысхэм яеплъы­кIэхэр къыдалъытэхэзэ, про­ектым епхыгъэ унашъохэр аштэнхэу.

«ПшъэдэкIыжь зыхьырэ къулыкъухэм зэдырагъаштэу Iоф ашIэн, инфраструктурэм зырагъэушъомбгъу зыхъукIэ Iофыгъоу къэуцухэрэр зэдызэшIуа­хын фае. Тэ пшъэрылъэу зэдытиIэр гъогухэр щынэгъончъэнхэр, автомобилистхэми, чIыпIэрысхэми амалэу яIэхэр на­хьышIу шIыгъэныр ары», — къы­Iуагъ КъумпIыл Мурат.

АР-м и ЛIышъхьэ ипресс-къулыкъу