Лъэпкъ проектэу «Культура» зыфиIорэм ишIуагъэкIэ Адыгэкъалэ дэт краеведческэ музеим иэкспозицие кIэу агъэпсыжьы, экспонатхэр зы­дагъэуцощт витринэхэр акIоцIкIэ къаблэхэу зэрагъэгъотыгъэх.

Музеим игъэтIылъыпIэ пае гъучI шкафхэу музей экспо­натхэмрэ документхэмрэ зы­дэлъыщтхэр къащэфыгъэх. Зэ­фэдэкIэ сплит-системэхэр ха­гъэуцуагъэх, аудиогидхэр къыз­IэкIагъэхьагъэх. Мыхэм анэ­мыкIэу, музеим иэкспозицие изалхэм ащыщ адыгэхэм яматериальнэ-культурэ кIэнкIэ дио­рамакIэр хагъэуцуагъ.

«Адыгэкъалэ икраеведческэ музей лъэпкъ адыгэ шъуашэ­хэмкIэ иэкспозицие хигъэхъон игухэлъ. ДжырэкIэ хъулъфыгъэ ыкIи бзылъфыгъэ шъуашэхэм яэскизхэр агъэхьазырыгъэх арагъэдынхэу. Лъэпкъ адыгэ шъуашэр цIыфэу музеим къы­чIахьэхэрэм ягъэлъэгъугъэным тегъэпсыхьэгъэ манекенхэр зэдгъэгъотыгъэх», — еIо Адыгэ­къалэ икраеведческэ музей идиректорэу З. ХьэдэгъалIэм.

Шъугу къэтэгъэкIыжьы мы уахътэм Урысыем культурэмкIэ и Министерствэ чIыпIэ музейхэм ямодельнэ шапхъэ Iоф дишIи зэригъэхьазырыгъэр, ащ ихьатыркIэ культурэ IофшIапIэхэм щыIакIэ зэрагъотыщтыр, ахэм а пстэумэ ялъытыгъэу нахь цIыфыбэ зылъащэ зэрэ­хъущтыр, ныбжьым е зыпылъхэ Iофым емылъытыгъэу. (Тикорр.).