АР-м и Къэралыгъо Совет — Хасэм и Тхьаматэу Владимир Нарожнэр мы тхьамафэм Джэджэ районым щыIагъ. Ащ игъусагъэх Парламентым ипащэ игуадзэу, мэкъумэщ политикэмкIэ, мылъку ыкIи чIыгу зэфыщытыкIэхэмкIэ Комитетым ипащэу Цэй Эдуард, АР-м экономикэ хэхъоныгъэхэмкIэ, мэкъумэщ хъызмэтымкIэ иминистрэхэу Шэуджэн Заур, Къуанэ Анзаур, АО-у «Газпром межрегионгаз Майкоп» зыфиIорэм ипащэу Игорь Сырчиныр.

Республикэ Парламентым ипресс-къулыкъу тызэрэщигъэгъозагъэмкIэ, Владимир Нарожнэм тхьамэтагъор зыщызэрихьэгъэ зэхэсыгъо станицэу Джа­джэм щызэхащэгъагъ. Мы районым ипсэупIэхэм социальнэ газификациемкIэ программэр зэрэщыпхыращыщтыр ары анахьэу Iофтхьабзэр зыфэгъэ­хьыгъагъэр. Джэджэ район администрацием ипащэу Андрей Таранухиныр, псэупIэ кой администрациехэм япащэхэр, къулыкъу ыкIи ведомствэ зэфэшъхьафхэм ялIыкIохэр ащ хэлэжьагъэх.

Зэхэсыгъом къызэрэщаIуа­гъэмкIэ, гъэстыныпхъэ шхъуан­тIэр ыпкIэ хэмылъэу ищагу ещэ­лIэгъэным фэгъэхьыгъэ про­граммэм мы муниципальнэ образованием ипсэупIэ 23-мэ адэ­сэу унэгъо 1138-рэ къыхеубытэ. Ахэм ащыщэу мы уахътэм лъэIу тхылъ къэзытыгъэр 366-р ары.

Программэм къызэрэщыдэлъытагъэмкIэ, Джэджэ районым щыпсэурэ унэгъо 1045-мэ 2022-рэ илъэсым, унэгъо 80-мэ 2023-м газыр афаращэлIэн фае. Мы уахътэм зыфагъэпсыгъэр унэгъо 77-рэ мэхъу.

Игорь Сырчиным къызэрэхигъэщыгъэмкIэ, лъэIу тхылъхэр къызэратырэм бэкIэ епхыгъ Iофхэр зэрэлъыкIотэщтхэр. Нахь чанэу ахэр къаIэкIагъахьэхэмэ, бжыхьэ-кIымэфэ уахътэу къызщыучъыIыщтым нэмысызэ га-зыр зыфатIупщыщтыр нахьыбэ хъущт.

Шъугу къэдгъэкIыжьын, псэупIэм гъэстыныпхъэ шхъуантIэр щызэбгырыщыгъэмэ, ар зыIэкIэмыхьэу дэсхэм ящагухэм ыпкIэ хэмылъэу афыращэлIэщт. УФ-м и Президентэу Владимир Путиныр ары ащ фэгъэхьыгъэ программэм кIэщакIо фэхъугъэр.

Владимир Нарожнэм социальнэ газификациер цIыфхэм IэпыIэгъушхо зэрафэхъущтыр къыхигъэщызэ, Iофым хэлъыр нахь зэхэугуфыкIыгъэу алъыгъэ­Iэсыгъэным мэхьанэ зэриIэм къыкIигъэтхъыгъ.

— ЛъэIу тхылъхэм ятынкIэ, нэмыкIэу ищыкIагъэхэм ягъэхьазырынкIэ лъэныкъо пстэумкIи IэпыIэгъу агъотын фае. Джащыгъум Iофхэр нахь кIэкIыщтых, — къыIуагъ рес­публикэ Парламентым ипащэ.

Нэужым бжыхьэсэ лэжьыгъэ­хэм яIухыжьын районым зэрэщыкIуагъэм, хьасэхэм язытет, фитосанитарнэ шапхъэхэр зэрагъэцакIэхэрэм зэхэсыгъом хэлажьэхэрэр атегущыIагъэх. ЦIыфым ипсауныгъи, лэжьыгъэ­хэм язытети зиягъэ языгъэкIырэ уц шIойхэр хьасэхэм къащымыкIынхэм, псэупIэхэр зэлъамыкIунхэм анаIэ тырагъэтыныр пшъэрылъ шъхьаIэхэм зэращыщыр Владимир Нарожнэм къыхигъэщыгъ.

— Амброзием мэкъумэщ хъызмэтым зэрарышхо регъэшIы, чIыгум иягъэ регъэкIы, лэжьыгъэ хьасэу ар зыхэтхэм къарахыжьырэр бэкIэ нахь макI, техникэр ахэхьаныри къины къешIы. Ахэм ямыза­къоу, амброзием цIыфым ипсауныгъэ зэще­гъакъо. Ар пстэумэ анахь шъхьаI, — къы­Iуагъ Парламентым и Тхьаматэ.

Уц шIойхэм, амброзиери зэрахэтэу, зэрар къамыхьыным пае псэупIэ кой администрациехэм, мэкъумэщ хъызмэтым пылъхэм ахэр зэрагъэкIодыхэрэм нахь гъэлъэшыгъэу улъыплъэныр хэкIыпIэхэм анахь тэрэзэу зэхэсыгъом хэлэжьагъэхэм зэдаштагъ.

ХЪУТ Нэфсэт.