Адыгэ Республикэм и Къэралыгъо Совет — Хасэм ибгъэхэлъ тамыгъэу «Закон. Пшъэрылъ. ЦIыфыгъ» зыфиIорэр зыфагъэшъошагъэхэм ащыщхэм гущыIэгъу тафэхъугъ.

Адыгэ Республикэм и Къэралыгъо Совет — Хасэм и Тхьаматэ игуадзэу, Урысыем и ЛIыхъужъэу Цэй Эдуард зэIукIэгъум къыщиIуагъ Шэуджэн районым иадминистрацие ипащэу Аулъэ Рэщыдэ илъэсыбэ хъугъэу хэбзэ къулыкъур зэри­гъэцакIэрэр. Гуетыныгъэ хэлъэу ипшъэ­рылъхэр зэшIуехых, иIофшIэгъухэр зы­лъещэх.

Къэралыгъо гъэпсыкIэ иIэу Адыгеир зыпсэурэр илъэси 100 зэрэхъурэм фэгъэхьыгъэ Iофтхьабзэхэр Шэуджэн районым щагъэцакIэх. Хьакурынэхьаблэ районым игупч. Къуаджэм революционнэ, лIыхъужъ ыкIи лэжьэкIо щытхъум япхыгъэ чIыпIэхэм ащалъэплъэх, зэIукIэгъухэр ащызэхащэх.

Шэуджэн районым иадминистрацие зычIэт унэм ыпашъхьэ Шэуджэн Мосэ ыцIэ зыхьырэ зыгъэпсэфыпIэ паркыр къыщызэIуахыгъ. КIэлэцIыкIухэм апае джэгупIэхэр щагъэпсыгъэх. Пшысэхэм къахэхыгъэ сурэтхэр паркым щыолъэ­гъух. КIэлэцIыкIухэм ахэр ашIогъэшIэгъоных, ахэм яхьылIагъэу ашIэрэр къызэфаIуатэ.

Парк дэхьапIэм лъэгъупхъэу щыт рево­люцием илъэхъан лIыхъужъныгъэ зезы­хьэгъэ Шэуджэн Мосэ исаугъэт. Жъалымыгъэ дызэрахьэзэ пыйхэм ар аукIыгъ. Мамыр щыIакIэм фэбэнэгъэ нарт лIыхъу­жъым ыгу къытемыожьырэми, лIыгъэу зэрихьагъэмкIэ къытхэт. ЗыщымыIэжьыр илъэси 100-м къехъугъэми, щысэ зытетхырэ цIыф лъэшэу гъашIэм щытиI.

ЛIыхъужъхэр гъашIэм къыщытхэтых

Хэгъэгу зэошхом лIыхъужъныгъэ щызезыхьагъэхэм, ячIыгу къаухъумэзэ фэхыгъэхэм афэгъэхьыгъэ саугъэтыр зыгъэпсэфыпIэ паркым къыпэгъунэгъу. Советскэ Союзым и ЛIыхъужъэу Андыр­хъое Хъусен ыцIэ зыхьырэ Унэ-музеири къоджэ пчэгум ит, цIыфхэм якIуапI.

Илъэс зэфэшъхьафхэм яхэгъэгу, ячIыгу къаухъумэзэ лIыгъэ зезыхьагъэхэр гъа­шIэм къыщытхэтых. Шэуджэн районым иадминистрацие ипащэу Аулъэ Рэщыдэ къызэриIуагъэу, къэралыгъо гъэпсыкIэ иIэу Адыгеир зыпсэурэр илъэси 100 зэрэхъурэм фэгъэхьыгъэ Iофтхьабзэхэр нахь игъэкIотыгъэу бжыхьэм зэхащэщтых.

Пащэр ящысэшIу

Республикэ общественнэ движениеу «Адыгэ Хасэм» икъутамэу Кощхьэблэ районым щыIэм ипащэу НэпшIэкъуй Амин ишIушIагъэкIэ Адыгэ Республикэм, къош республикэхэм ар ащашIэ. Илъэсыбэ хъугъэ Кощхьэблэ районым и Адыгэ Хасэ Амин ипащ.

Кощхьэблэ районым иадминистрацие щыкIогъэ зэхахьэм АР-м и Парламент и Тхьаматэ игуадзэу Цэй Эдуард къыщыгущыIагъ. Парламентым ибгъэхэлъ тамыгъэу «Закон. Пшъэрылъ. ЦIыфыгъ» зыфиIорэр НэпшIэкъуй Амин къызэрэфагъэшъошагъэм зэIукIэгъум хэлажьэ­хэрэр щигъэгъозагъэх.

Кощхьэблэ районым иадминистрацие ипащэу Хьамырзэ Заур хабзэм икъулыкъушIэхэмрэ Адыгэ Хасэм хэтхэмрэ зэгурыIоныгъэ ахэлъэу Iоф зэрэзэдашIэ­рэм шIуагъэу къытырэр зэIукIэгъум щыхи­гъэунэфыкIыгъ.

НэпшIэкъуй Амин щыIэныгъэм щыкIагъэу хилъагъорэм къытегущыIэныр, Iэшъ­хьэтетхэр бэрэ къыубынхэр ишэнэп. Iофым изэхэщакIохэм гъусэ афэхъуныр, иамал елъытыгъэу ишIуагъэ аригъэкIыныр хэбзэ пытэ фэхъугъ.

Республикэ общественнэ движениеу «Адыгэ Хасэм» итхьаматэу ЛIымыщэкъо Рэмэзан Кощхьэблэ районым иадминистрацие щыкIогъэ зэхахьэм хэлэжьагъ. НэпшIэкъуй Амин Адыгэ Хасэм хэтхэм щысэ зэрафэхъурэм иеплъыкIэхэр къыриIолIагъэх.

Адыгэ Хасэм и Хэсашъхьэ изэIукIэгъу­хэм НэпшIэкъуй Амин пэшIорыгъэшъэу зафегъэхьазыры, Iофым хэкIыпIэу къыфигъотыщтхэр зэфехьысыжьых. Зэхахьэм бэрэ къыщыгущыIэныр, цIыфхэм уахътэр аIихыныр къыригъэкIухэрэп.

Кощхьаблэ игупчэ адыгэ литературэм лъапсэ фэзышIыгъэ тхакIоу КIэрэщэ Тембот исаугъэт щыгъэуцугъэным, адыга­бзэр кIэлэцIыкIу IыгъыпIэхэм, еджапIэхэм нахьышIоу ащызэрагъэшIэным, нэмыкI Iофыгъохэм А. НэпшIэкъуир чанэу ахэлэжьагъ.

«ИлэжьакIэ фэд илэжьыгъэ» адыгэмэ аIо. А. НэпшIэкъуим къытиIуагъэмэ къахэд­гъэщырэр: узыщыщ лъэпкъым ыбзэ, итарихъ, шэн-хабзэхэр дэгъоу зэбгъэшIэнхэ, ныбжьыкIэхэм щысэ уафэхъун фае. Iофым уфежьэным ыпэкIэ уиамалхэр къыдэлъытэх, гъусэ къыпфэхъущтхэм ягупшыс.

— Бзыуцыфым машIо хэбгъэбылъхьан плъэкIыщтэп, — тизэдэгущыIэгъу лъегъэ­кIуатэ ЛIымыщэкъо Рэмэзан. — Адыгэ Хасэм Iоф щызышIэ зышIоигъохэр Нэп­шIэкъуй Амин фэдэхэм акIырыплъыхэ тшIоигъу. Щытхъу къэпхьыным пае Адыгэ Хасэм ухэмыхь, цIыфхэм уишIуагъэ зэрябгъэкIыщтым егупшыс. Бзыуцыфым машIор кIэудзэмэ сыдэущтэу бгъэкIосэжьыщта? Ащ сыдигъуи уегупшысэн фаеу Амин елъытэ.

— Лъэпкъыбэ Кощхьэблэ районым щэпсэу, дин зэфэшъхьафхэр щалэжьы. ЦIыфхэр зэбгъэшIунхэм фэшI уядэIун, ягумэкIхэр зэхэпхынхэм уфэхьазырын фае. УишIуагъэ зэрябгъэкIыщтым унаIэ тедз, — еIо НэпшIэкъуй Амин.

Ти ЛIышъхьэу КъумпIыл Мурат, Правительствэр, Парламентыр, Кощхьэблэ районым ихэбзэ къулыкъушIэхэр цIыфхэм ящыIэкIэ-псэукIэ нахьышIу шIыгъэнымкIэ кIэщакIо зыфэхъухэрэ Iофтхьабзэхэм А. Нэп­шIэкъуим защегъэгъуазэ. Пэщэ IэнатIэм уIут зыхъукIэ Iоф зэхэдз пшIыныр мытэрэзэу елъытэ.

Урысыем щыпсэурэ лъэпкъхэм яискусствэрэ якультурнэ кIэнрэ мыгъэ я Илъэс. Лъэпкъ IэпэIасэхэм яIэшIагъэхэм яхьылIэгъэ къэгъэлъэгъонхэу республикэм щыкIохэрэм Адыгэ Хасэр ахэлажьэ.

СурэтышI-модельер цIэрыIоу СтIашъу Юрэ Адыгэ Хасэм игъэцэкIэкIо куп хэт. Ащ иIофшIагъэхэр США-м, Тыркуем, Сирием, Иорданием, Москва, Къыблэм, Темыр Кавказым, нэмыкIхэм къащагъэ­лъэгъуагъэх. Олимпиадэ джэгунхэу Шъа­чэ щыкIуагъэхэм якультурнэ программэ хэлэжьагъ. Тилъэпкъ IэпэIасэхэм яIоф­шIагъэ дунаим нахьышIоу щашIэным Адыгэ Хасэр тапэкIи зэрэпылъыщтыр ЛIымыщэкъо Рэмэзанрэ НэпшIэкъуй Аминрэ къаIуагъ.

ТIэшъу Нурбый, ГъукIэ Замудин, Гостэкъо Руслъан, Бэджэкъо Бэлэ, Гумэ Ларисэ, Хъуажъ Рэмэзан, Гъогунэкъо Мухьарбый, Абрэдж Гощэфыжь, нэмыкI­хэм ацIэхэр къыраIуагъэх. Ясэнэхьат хэшIыкI фызиIэхэм, Iофтхьабзэхэм якIэщакIохэм Адыгэ Хасэр сыдигъуи ягъу­сэщт, ныбжьыкIэхэм щысэ афэхъущтых, лIэужхэм ялъэмыджхэр агъэпытэщтых. ЕмтIылъ Нурбый.