Адыгеим, Урысыем инэмыкI шъолъырхэм афэдэу, Донбасс, Херсон­скэ ыкIи Запорожскэ хэкухэм ащыпсэухэрэм шIушIэ IэпыIэгъу ареты.

ГущыIэм пае, Адыгэ Респуб­ликэм джырэкIэ зызфигъэза­гъэр Херсонскэ хэкум и Геническэ район хэхъоныгъэ ышIынымкIэ ыкIи а чIыпIэр зыпкъ игъэуцо­жьыгъэнымкIэ дэIэпыIэныр ары. Адыгеим и ЛIышъхьэу КъумпIыл Мурат пэщэныгъэ дызэрихьэзэ Iофтхьабзэхэр зэшIуахых. Партиеу «Единэ Россием» ишъо­лъыр къутамэ а Iофхэм ягъэцэкIэн фэгъэзагъ.

Мы лъэхъаным Адыгеим ыцIэкIэ специалист купым Геническэ районым Iоф щешIэ, чIыпIэ администрацием лъэныкъо зэфэшъхьафхэмкIэ методическэ ыкIи упчIэжьэгъу IэпыIэгъу реты. IэпыIэгъоу ящыкIа­гъэр зыфэдизыр агъэунэфыным пае чIыпIэм социальнэ-экономическэ лъэныкъомкIэ изытет зэрагъашIэ, зэкIэми апэу зэшIо­хыгъэн фэе пшъэрылъэу щытхэр агъэнафэх, социальнэ учреждениехэм, псэуалъэхэм, транспорт ыкIи инженер инфраструктурэм къыхиубытэхэрэм язытет зэрагъашIэ.

Адыгеим и ЛIышъхьэ игъо зэрилъэгъугъэм тетэу а районым щыпсэурэ цIыфхэу чIыпIэ зэжъу ифагъэхэм апае шIушIэр респуб­ликэм щаухьазы­ры. Ащ фэдэ тонн 20 фэ­диз хъурэм иапэрэ партие Мыекъуапэ икIи Геническэ ежьагъ.

Партиеу «Единэ Россием» ишъолъыр гъэцэкIэкIо комитет ипащэу АфэшIэгъо Рэмэзан къызэриIуагъэмкIэ, цIыфхэм анахь ящыкIэгъэ пкъыгъохэр ыкIи гъомылапхъэхэр: хьаджыгъэр, тхьацум хэшIыкIыгъэ крупэ лъэпкъхэр, щаир, кIэлэцIыкIу шхынхэр, тыгъэгъэзэ дагъэр, консервхэр ыкIи нэмыкIхэр афарагъащэх. Ащ нэмыкIэу шIушIэ IэпыIэгъум хэхьагъэх спорт Iэмэ-псымэхэр, кIэлэцIыкIу IыгъыпIэхэм апае джэгуа­лъэхэр.

«ЦIыфхэу фэныкъохэм Ады­геим защиухьэу зыпарэкIи къыхэкIыгъэп. Тэ дэгъоу къыд­гурэIо игъом пIэ афэпщэиным ыкIи ящыкIэгъэ IэпыIэгъур яптыным мэхьанэу иIэр», — къыIуагъ КъумпIыл Мурат.

Шъугу къэтэгъэкIыжьы: мы мафэхэм шIушIэ IэпыIэгъоу а районым ращэжьагъэм нэмыкIэу гъэтхапэм къыщыублагъэу ДНР-м ыкIи ЛНР-м ащыпсэу­хэрэм апае шIушIэ тонн 86-рэ афарагъэщагъ.

АР-м и ЛIышъхьэ ипресс-къулыкъу