Адыгэ Республикэм и Правительствэ зычIэт унэм щыкIогъэ зэхэсыгъор зыфэгъэхьыгъагъэр экономикэм иотраслэхэмрэ социальнэ лъэныкъомрэ, мыхэм ахэхьэх псауныгъэм икъэухъумэн, гъэсэныгъэр, къэралыгъо гъэIорышIэныр, япхыгъэ Iофыгъохэр зэшIохыгъэнхэмкIэ цифрэ технологиехэр гъэфедэгъэнхэр ары. Адыгеим и ЛIышъхьэу КъумпIыл Мурат пшъэрылъ зэрэфишIыгъэм тетэу Адыгэ Республикэм и Премьер-министрэ ипшъэрылъхэр зыгъэцэкIэрэ КIэрэщэ Анзаур зэхэсыгъор зэрищагъ.

Адыгэ Республикэм цифрэ хэхъоныгъэмкIэ иминистрэу Шыу Заурбек ащ фэгъэхьыгъэ псалъэ къышIыгъ. КъызэрэхигъэщыгъэмкIэ, республикэ къэралыгъо программэу «Цифровая трансформация Республики Адыгея» зыфиIорэм 2022-рэ илъэсым сомэ миллион 53,9-рэ пэIуагъэхьащт.

Ащ нэужым отраслэхэм яIоф­хэм язытет фэгъэхьыгъэу ащ къыIотагъ. Программэм изэшIохын тегъэпсыхьагъэу мыщ хэлэжьэрэ ведомствэ пэпчъ пшъэрылъ гъэнэфагъэхэр иIэщтых.

Адыгэ Республикэм и Премьер-министрэ ипшъэрылъхэр зыгъэцэкIэрэ КIэрэщэ Анзаур республикэ шэпхъэ базэу ащ епхыгъэщтыр псынкIэу агъэ­псынэу пшъэрылъ къафишIыгъ. Ащ нэмыкIэу министерствэ ыкIи ведомствэ пэпчъ «гъогу картэ­кIэ» заджэхэрэр зэхигъэуцон ыкIи дэх имыIэу ыгъэцэкIэн фае. Программэр зэшIохыгъэнымкIэ пшъэдэкIыжь зы­- ­хьы­хэрэр егъэджэгъэнхэ зэрэфаем иIофыгъо шъхьафэу къа­Iэтыгъ, хабзэм ифедеральнэ къулыкъу­хэм ащкIэ ипIалъэм къыпэу заявкэхэр аIэкIагъэ­хьанхэ фае.

ЗэIукIэм джыри зы Iофыгъо къыщаIэтыгъ: Адыгэ Респуб­ликэм и ЛIышъхьэ дэжь Координационнэ гупчэ щызэхэщэгъэ­ныр. Ащ ишIуагъэ къэкIощт пэщэныгъэ зехьэгъэнымкIэ ыкIи Iофхэм ягъэзекIонкIэ пшъэры­лъэу къэуцухэрэр нахь дэгъоу зэшIохыгъэнхэмкIэ, ведомствэхэм проектхэм ягъэцэкIэнкIэ зэдэлэжьэныгъэ азыфагу илъы­нымкIэ ыкIи нэмыкIхэмкIэ.

Видеозэпхыныгъэ шIыкIэм тетэу зэдэгущыIэгъум къыхэлэжьагъ Урысые Федерацием и Правительствэ дэжь щызэхэщэгъэ Координационнэ гупчэ ипащэ игуадзэу Владислав Доброницкэр. Федеральнэ лъэгапIэм тетэу ащ фэдэ IофшIэныр гъэцэкIэгъэнымкIэ опытэу аIэ­кIэлъ хъугъэм ар къытегущы­Iагъ, республикэм Координационнэ гупчэ щызэхэщэгъэнымкIи ишIуа­гъэ къыгъэкIоным зэрэ­фэ­хьа­зырыр къыхигъэщыгъ.

ЗэIукIэм икIэуххэр зэфихьысыжьхэзэ, Адыгеим и Премьер-министрэ ипшъэрылъхэр зыгъэцэкIэрэ КIэрэщэ Анзаур къызэриIуагъэмкIэ, цифрэ технологиехэр отраслэ пстэуми ащыгъэфедэгъэнхэм иIофыгъо республикэм и ЛIышъхьэу Къум­пIыл Мурат ышъхьэкIэ ынаIэ тырегъэты. Мыщ дэжьым ана­х­ьэу къыхэгъэщыгъэн фаер гъэ­IорышIэн лъэныкъомкIэ элек­троннэ системэхэм зягъэушъом­бгъугъэным имызакъоу, IофшIэнымкIи, цIыфхэр зыгъэгумэкIыхэрэ анахь мэхьанэ зиIэ Iофыгъохэр псынкIэу ыкIи игъом зэшIохыгъэнхэмкIи ар къашъхьапэщт.

АР-м и ЛIышъхьэ ипресс-къулыкъу