Адыгеим ичIыгулэжьхэм цумпэр къызщагъэкIырэ чIыгу­хэм ахагъахъо. Адыгеим и ЛIышъхьэ къызэрэхигъэщыгъагъэмкIэ, непэ республикэм гектари 133-м цумпэр къыщагъэкIы. Илъэсэу икIыгъэм гектар 18 ащ хагъэхъуагъ. ТапэкIи чIыгухэм зарагъэушъомбгъунэу ямурад.

ГущыIэм пае, проектэу «Предпринимательствэ цIыкIумрэ ыкIи гурытымрэ, унэе предпринимательхэм IэпыIэгъу ятыгъэныр» зыфиIорэм тегъэпсыхьагъэу грант IэпыIэгъоу «Агростартап» зыфиIорэр агъэфедэ.

Адыгэ Республикэм мэкъу-мэщымкIэ и Министерствэ экономикэ ушэтынхэмрэ къэралыгъо программэхэмрэ япхырыщын фэгъэзэгъэ отделэу иIэм ипащэу Шъэожъ Абрек къызэриIуагъэмкIэ, мы аужырэ илъэситIум езгъэжьэгъэкIэ фермер 16-мэ сомэ миллион 25-м ехъу зыпэIухьэгъэ грантхэр аратыгъэх.

ГущыIэм пае, Тхьэлъэнэ Мурат Вячеслав ыкъом сомэ мин 1129-рэ 2022-рэ илъэсым къыIэкIэхьагъ, оборудованиеу ищыкIэгъэщтымрэ цумпэ гъэIыстэжьымрэ якъэщэфын ар пэIуигъэхьащт.

ХъызмэтшIапIэм ипащэ къызэрэхигъэщыгъэмкIэ, унэе хъызмэтэу иIэм цумпэр бэшIагъэ къызщигъэкIырэр. Джы къэралыгъо IэпыIэгъум ишIуагъэкIэ гектар 1,3-м илъэсэу къихьащтым цумпэ тонни 5 фэдиз къырихынэу мэгугъэ. ИлъэситIу горэмкIэ, чIыгоу цумпэр зыщилэжьыщтыр гектари 2,2-м зынигъэскIэ, тонн 15 фэдиз къырихынэу егупшысэ.