Адыгеим и СМИ иIофышIэхэу АР-м и Къэралыгъо Совет — Хасэм итынхэр къызфагъэшъошагъэхэм тыгъуасэ аратыжьыгъэх.

Парламентым и Тхьаматэ игуадзэхэу Iащэ Мухьамэдрэ Цэй Эдуардрэ ГТРК-у «Адыгеим», республикэ гъэзетхэу «Адыгэ макъэм», «Советскэ Адыгеим», нэмыкIхэм ащылажьэхэу къыхагъэщыгъэхэм къафэгушIуагъэх, гъэхъагъэхэр ашIызэ тапэкIи яIофшIэн лъагъэ­кIотэнэу, псауныгъэ пытэ яIэнэу, яунагъохэм мамыр арылъынэу къафэлъэIуагъэх.

Адыгеим и Парламент зызэхащагъэр илъэс 30 зэрэхъурэм фэгъэхьыгъэу къыдагъэкIыгъэ щытхъу тамыгъэмкIэ къыхагъэщы­гъэх республикэ гъэзетэу «Адыгэ макъэм» иредактор шъхьаIэу Дэрбэ Тимур, икорреспондентэу Хъут Нэфсэт, гъэзетэу «Советская Адыгея» зыфиIорэм иредактор шъхьаIэу Цундышкэ Зарэ, икорреспондентэу Юлия Мельниковар, ГТРК-у «Адыгеим» иIофышIэу Кудаикъо Алый.

Джащ фэдэу АР-м и Парламент ирэзэныгъэ тхылъ къызфагъэшъошагъэхэм ащыщых «Адыгэ макъэм» иоператорэу Нэгъой Сафыет, «Советскэ Адыгеим» пшъэдэкIыжь зыхьырэ исекретарэу Александра Минаковар, ГТРК-у «Адыгея» зыфи­Iорэм иIофышIэхэу Тхьагъэпсэу Саидэ, Борэкъо Фатимэ, Хъу­тIыжъ Светланэ, нэмыкIхэр.