Программэу «Адэбз узхэм апэ­шIуе­кIогъэныр» зыфиIорэм диштэу республикэм ионкологическэ диспансер мы илъэсым нахь дэгъоу зэтырагъэпсыхьаным пае сомэ миллиони 117,7-рэ къыхагъэкIыгъ.

Медицинэ оборудование 18 къащэфыгъ. Ащ ишIуагъэкIэ технологие лъагэр зылъапсэу щыт хирургическэ IэпыIэгъур цIыфхэм нахь къызыфагъэфедэн алъэкIы хъугъэ. 2022-рэ илъэсым пыкIыгъэ мэзихым къы­кIоцI ащ фэдэ технологием диштэрэ медицинэ IэпыIэгъу нэбгыри 100 фэдизмэ аратыгъ.

ИгъэкIотыгъэ операциехэу афашIыгъэхэр нахьыбэмкIэ зэпхыгъэхэр кIышъо узхэр, молочнэ железар, кIэтIый гъумыр ыкIи нэмыкIхэр ары.

Онкологие къулыкъур респуб­ликэм джыри нахь дэгъоу щызэхэщэгъэным тегъэпсыхьагъэу Урысыем псауныгъэр къэу­хъумэгъэнымкIэ и Министерствэ ифедеральнэ къэралыгъо бюджет учреждениеу «НМИЦ онкологии» зыфиIорэм испециалистхэр бэдзэогъум и 26-м къыщегъэжьагъэу и 29-м нэс Адыгэ Республикэм щыIэщтых. А Iофтхьабзэр зыфэгъэ­хьыгъэр республикэм медицинэ онкологие IэпыIэгъур зэрэщызэхэщагъэр зэгъэшIэгъэныр ыкIи уасэ ащ фэшIыгъэныр ары.

Адыгэ Республикэм псауныгъэр къэухъумэгъэнымкIэ и Министерствэ къызэритыгъэмкIэ, а Iофтхьабзэм диштэу специалистхэр республикэм ионкологическэ структурэ зэфэшъхьафхэм ащыIэщтых: М. Хъ. Iэшъхьэмафэм ыцIэкIэ щыт Адыгэ республикэ клиническэ онкологическэ диспансерым, К.М. Батмэным ыцIэкIэ щыт район сымэджэщэу Адыгэкъалэ дэтым. Медицинэ документхэр ауплъэкIущтых, онкологическэ къулыкъум технологие зэфэ­шъхьафхэр щыгъэфедэгъэнхэмкIэ амалэу щыIэхэм атегущыIэщтых, джащ фэдэу тапэкIи язэдэлэжьэныгъэ зэрэкIощт лъэныкъохэр агъэнэфэщтых.

«Непэ онкологием ылъэныкъо­кIэ сымаджэхэу адэбзыр къыз­хагъэщыгъэхэу а 1-рэ ыкIи я 2-рэ стадиехэр зиIэхэм япчъагъэ процент 61,7-рэ зэрэхъурэр. Мыщ фэдэ зэIукIэгъухэм яшIуа­гъэ къэкIо джырэ лъэхъаным диштэрэ шIыкIэ-амалхэу щыIэ­хэмкIэ нахь игъэкIотыгъэу зэхъожьынхэмкIэ, джащ фэдэу республикэм онкологиемкIэ икъулыкъу Iофэу ышIэрэм шIуа­гъэу къытырэм зыкъегъэIэтыгъэ­нымкIэ», — къыщаIуагъ Адыгэ Рес­публикэм псауныгъэр къэ­ухъумэгъэнымкIэ и Министерствэ.