Адыгеим икъэлэ шъхьаIэ дэт подстанциеу «Севернэм» изэтегъэпсы­хьажьын фежьагъэх. Компаниеу «Россети Кубань» зыфиIорэм мы псэуалъэм игъэкIэжьын сомэ миллион 740-рэ фэдиз пэIуигъэхьан имурад.

АР-м экономикэ хэхъоны­гъэмкIэ ыкIи сатыумкIэ и Министерствэ къызэрэщаIуа­гъэмкIэ, подстанциеу «Севернэр» техническэу зэ­те­гъэпсыхьэ­гъэнымкIэ ищыкIэгъэ пстэур тихэгъэгу къыщы­дагъэкIы.

Проектым къыдыхэлъытагъэу энергетикхэм трансформатор инитIу агъэуцущт. АР-м эко­номикэ хэхъоныгъэмкIэ ыкIи сатыумкIэ и Министерствэ макъэ къызэригъэIугъэу, мы псэуа­лъэр зызэтырагъэпсы­хьэкIэ, ащ ыкIуа­чIэ хэпшIыкIэу нахьыбэ хъущт, МВА 130-м нэ­сыщт.

Подстанциеу «Севернэм» къалэу Мыекъуапэ итемыр лъэ­ныкъо щыIэ район цIыкIум ищыкIэгъэ электричествэр ригъэгъотыщт.

Мэхьанэ зиIэ энергопсэуа­лъэм игъэцэкIэжьын-зэтегъэ­псыхьан Адыгеим иминистрэхэм я Кабинетрэ компаниеу «Россети Кубань» зыфиIорэмрэ язэзэгъыныгъэ къыдыхэлъытагъэу зэшIуахыщт. Ащ къызэ­рэ­щиIорэмкIэ, вольт ин зиIэ подстанциехэр, электричествэм ирыкIуапIэхэр къалэу Мые­къуапэ, Мыекъопэ, Джэджэ, Теуцожь ыкIи Тэхъутэмыкъое районхэм ащагъэпсыщтых. (Тикорр.).