Адыгеир къэралыгъо гъэпсыкIэ иIэу зыщыIэр непэ илъэси 100 хъугъэ
Адыгэ Республикэм щыпсэухэу лъытэныгъэ зыфэтшIыхэрэр!
ТичIыпIэгъу лъапIэхэр!
Тишъолъыр итарихъкIэ мэхьанэшхо зиIэ хъугъэ-шIагъэмкIэ — Адыгеир къэралыгъо гъэпсыкIэ иIэу зыщыIэр илъэси 100 зэрэхъурэмкIэ тышъуфэгушIо!
1922-рэ илъэсым бэдзэогъум и 27-м Адыгеим РСФСР-м хэхьэрэ автономие иIэ зэрэхъугъэр тилъэныкъо гупсэ итарихъ ичэзыукIэ ублапIэ фэхъугъ, лъэпкъ зэфэшъхьафхэу ащ щыпсэухэрэм къарыкIощтымкIи ащ мэхьанэшхо иIагъ.
Гъэпсынымрэ хэхъоныгъэмрэ япхыгъэ гъогушхо лIэшIэгъум къыкIоцI Адыгеим къыкIугъ, щыIэныгъэм илъэныкъо пстэуми зэхъокIыныгъэшIухэр афэхъунхэмкIэ, республикэм теплъэу иIэр зэблэхъугъэ хъунымкIэ бэ ащ къытыгъэр.
Непэ Урысые Федерацием и Президент, и Правительствэ, джащ фэдэу Федеральнэ ЗэIукIэм яIэпыIэгъу хэлъэу экономикэм, социальнэ лъэныкъом хэхъоныгъакIэхэр афэхъунхэмкIэ бэ зэшIотхырэр. Владимир Путиным мэхьанэшхо зиIэ стратегическэ пшъэрылъхэу къыгъэуцухэрэр гъэцэкIагъэ мэхъух, промышленностым, зекIоным, мэкъу-мэщым хэхъоныгъэ ашIы, унакIэхэр, гъогукIэхэр тэгъэпсых, инвестициехэр нахьыбэу зэрэдгъэфедэщтхэм, тикъалэхэм, типсэупIэхэм, тикъуаджэхэм ятеплъэ нахьышIу шIыгъэным тадэлажьэ.
Адыгеир ятIонэрэ илъэсишъэм хэхьэ тапэкIи хэхъоныгъэ ышIыным тегъэпсыхьэгъэ лъэпсэ пытэ иIэу. Илъэс 30-м ехъугъэу Урысые Федерацием ишъолъырэу ар щыт, гухэлъ шъхьаIэу иIэм – Республикэм ыкIи ащ щыпсэурэ нэбгырэ пэпчъ щыIэкIэшIу яIэным ицыхьэ зытелъыжьэу фэкIо.
Лъытэныгъэ зыфэтшIырэ тичIыпIэгъухэр!
Мы мэфэкIышхом Адыгеим ифедэ зыхэлъ IофшIэнэу жъугъэцакIэрэм пае инэу тызэрэшъуфэразэр къэтэIо. Анахьэу етIани тызфэразэр тинахьыжъхэу, IофшIэным иветеранхэу, тиреспубликэ иэкономикэ ылъапсэ зыгъэпытагъэхэр, непи ащ чанэу зиIахь хэзышIыхьэхэрэр ары. ЗэкIэми ткIуачIэ зэхэлъмэ, тиреспубликэ инэкIубгъо шIэгъуабэ тарихъым зэрэхэхьащтым тицыхьэ телъ.
Тыгу къыддеIэу зэкIэ республикэм щыпсэухэрэм тафэлъаIо псауныгъэ пытэ яIэнэу, зэгурыIонхэу, шIум щымыкIэхэу, дунаир мамырэу псэунхэу, Адыгеимрэ ти Хэгъэгушхоу Урысыемрэ яфедэ зыхэлъ Iофым гъэхъэгъакIэхэр щашIынхэу!
Адыгэ Республикэм и ЛIышъхьэу, Урысые политическэ партиеу «Единэ Россием» и Адыгэ шъолъыр къутамэ и Секретарэу КъумпIыл Мурат
Адыгэ Республикэм и Къэралыгъо Совет — Хасэм и Тхьаматэу Владимир Нарожнэр