Гъэзетэу «Шапсугием» иредактор шъхьа­Iэу, «Адыгэ макъэм» исобкорэу Ныбэ Анзор имэфэкI мы ма­фэхэм хигъэунэфыкIыгъ.

Ныбэ Анзор дунаим щы­зэлъа­шIэрэ журналист. Зыщыпсэурэ Шапсыгъэ шъо­лъы­рым имызакъоу, адыгэу IэкIыб къэралхэм ащыпсэухэрэм алъэ­Iэсы. Тыркуем, Израиль, фэшъхьаф хэгъэгухэм ащы­Iагъ. Лъэпкъым итарихъ, икультурэ, ишэн-хабзэхэм, спортым, нэмыкIхэм афэгъэ­хьыгъэ итхыгъэхэр гъэшIэгъоных, уагъэ­гъуазэ.

— Лъэпкъыбэ зыщыпсэурэ Краснодар краим Iоф щысэшIэ, — къеIуатэ Ныбэ Анзор. — Журналист сэнэхьатыр лъэшэу сшIогъэшIэгъон. СигупшысэхэмкIэ цIыфхэм салъэIэсы, ежьхэм ягулъытэ зэсэгъашIэ. Сыфай шIоу щыIэр къа­дэхъунэу, зэгурыIоныгъэ ахэлъэу зэдыщыIэнхэу.

ЦIыфхэм ящыIакIэ нахьышIу хъуным пылъ журналистэу Ныбэ Анзор имэфэкI мафэ пае тыфэгушIо. Ар жанрэ зэфэшъхьафхэмкIэ матхэ, сурэтхэр фэIэпэIасэу тырехых, гукIэгъоу хэлъыр итхыгъэхэм къахэщы.

Опсэу, Анзор! Уитворчествэ хэбгъэхъонэу, уиунагъо удатхъэу ущыIэнэу, нарт бэгъашIэ ухъунэу Тхьэм тыпфе­лъэIу! «Адыгэ макъэм» иIофышIэхэр.