2014-рэ илъэсым къыщегъэжьагъэу бэдзэогъум и 25-м Урысыем иследственнэ къулыкъу иIофышIэхэм ямэфэкI хагъэунэфыкIы. Мы къулыкъум и Мафэ тарихъ мэхьанэ иIэу щыт. 1713-рэ илъэсым бэдзэогъум и 25-м Апэрэ Петр иунашъокIэ Урысыем хэушъхьафыкIыгъэ следственнэ къулыкъу (следственнэ канцелярие) щагъэпсыгъ, ар хэгъэгумкIэ апэрэ къэралыгъо къулыкъу хъугъэ.

Урысыем иследственнэ къулыкъу исистемэ зэхъокIыныгъэ­шхохэр зыфашIыгъэр 2020-рэ илъэсыр ары. Ащ дакIоу илъэси 10 хъугъэу Следственнэ комитетым федеральнэ къэралыгъо структурэ шъхьафэу Iоф ешIэ. Мы аужырэ илъэсхэм шIуагъэ къытэу бзэджэшIагъэхэм апэу­цужьыгъэ­нымкIэ, ахъщэ къолъхьэ тын-Iыхыным пэшIуекIогъэнымкIэ, зыныбжь имыкъугъэхэм яшIоигъоныгъэхэр къэухъумэ­гъэн­хэмкIэ хэбзэухъумэкIо къу­лыкъу сис­темэм Следственнэ комитетым дэгъоу зыкъыщи­гъэ­лъэ­гъуагъ.

Федеральнэ хэбзэгъэуцугъэу къыдэкIыгъэм диштэу, илъэсипшIыкIэ узэкIэIэбэжьмэ агъэ­псыгъэ Комитетыр непэ структурэ шъхьафэу щыт ыкIи цIыф­хэм яфитыныгъэхэр къэухъумэгъэнхэмкIэ, къэралыгъом рэ­хьатныгъэрэ зыпкъитыныгъэрэ илъынхэмкIэ ащ пшъэдэкIыжьы­шхо ехьы.

— Тикъулыкъу мэхьанэшхо зэриIэр, хэбзэухъумэкIо системэм чIыпIэ гъэнэфагъэ зэрэщиубытырэр щыIэныгъэм къыгъэлъэгъуагъ. БзэджашIэ­хэм апэшIуекIогъэныр, къэралыгъом пшъэрылъэу къыгъэу­цухэрэр шIуагъэ къытэу гъэцэкIэгъэнхэр — джары тиIоф­шIэнкIэ анахь шъхьаIэу щытыр. Следователэу Iоф пшIэныр къины ыкIи пшъэдэкIы­жьышхо пылъ, ау тикъулыкъу­шIэхэм зэрифэшъуашэу япшъэ­рылъхэр агъэцакIэх. Кадет классэу зэхэтщагъэм мэхьанэшхо етэты, ащ щеджэ­рэ ныбжьыкIэхэм бэкIэ тащэгугъы, зисэнэхьат хэшIыкIы­шхо фызиIэ следовательхэр къахэкIынхэу тыфай, — еIо Урысыем и Следственнэ комитет иследственнэ ГъэIорышIапIэу Адыгеим щыIэм ипащэу Сергей Солнцевым.

ЦIыфхэм яшъхьафитыныгъэ ыкIи яфитыныгъэхэр къэухъумэгъэнхэмкIэ, бзэджэшIагъэхэр шъыпкъагъэ хэлъэу зэхэфыгъэн­хэмкIэ Урысые Федерацием и Следственнэ комитет къафигъэу­цугъэ пшъэрылъхэр дэх имыIэу къулыкъушIэхэм агъэцакIэх. ГъэIорышIапIэм анахьэу ынаIэ зытыригъэтырэ Iофыгъохэм ащы­щых шъыпкъагъэ хэлъэу следствиер зэхэщэгъэныр, бзэ­джэшIагъэу зэрахьагъэм зизэрар къякIыгъэхэм хэбзэгъэуцугъэм къызэрэдилъытэу яфитыныгъэхэр къэухъумэгъэнхэр, ахъщэ къолъхьэ тын-Iыхыным ыкIи нэмыкI коррупционнэ нэша­нэ зиIэ бзэджэшIагъэхэр къыхэгъэщыгъэнхэр, терроризмэм ыкIи экстремизмэм алъэныкъо­кIэ зэрахьэрэ бзэджэшIагъэхэм цIыфхэр ащыухъумэгъэнхэр, нэмыкIхэри.

Мы мафэм ехъулIэу АР-м иследственнэ ГъэIорышIапIэ къулыкъушIэ нэбгырэ 56-мэ Iоф щашIэ. Ащ иаппарат хахьэ анахь Iоф хьылъэхэм язэхэфын дэлажьэхэрэр ыкIи криминалистикэр, уплъэкIун-следственнэ отделыр, кадрэхэмкIэ подразделением иIофышIэхэр, цIыфхэм яупчIэхэм джэуап язытыжьырэ къулыкъушIэхэр, нэмыкIхэри.

2022-рэ илъэсым иапэрэ мэзихэу пыкIыгъэм бзэджэшIагъэ зэрэзэрахьагъэм епхыгъэ Iоф 1045-рэ следовательхэм зэхафыгъ. Уголовнэ Iоф 202-рэ къызэIуахыгъ, 145-р хьыкумым фагъэхьыгъ. Зэрарыр сомэ миллион 35-м ехъу. Мы мафэхэм къолъхьэ тын-Iыхыным епхыгъэ уголовнэ Iоф пчъагъэхэм язэхэфын следовательхэм Iоф дашIэ.

Ащ нэмыкIэу цIыфхэм закъы­фагъэзэн алъэкIынэу следственнэ ГъэIорышIапIэм чэщ-зымафэм Iоф зышIэрэ цыхьэшIэгъу телефон номерэу 8(8772)-56-04-26-м Iоф ешIэ.

Мы мафэхэм къулыкъушIэ­хэмрэ чIыпIэ следственнэ подразделениехэмрэ Донецкэ ыкIи Луганскэ народнэ республикэ­хэм къарыкIыгъэхэм юридическэ ыкIи нэмыкI упчIэжьэгъу Iэпы­Iэгъу арагъэгъоты.

Урысыем иследственнэ къулыкъу иIофышIэхэм ясэнэхьат епхыгъэ мэфэкIымкIэ тафэгушIо, тапэкIи гъэхъэгъэшIухэр ашIынхэу афэтэIо.

КIАРЭ Фатим.