Социальнэ газификацием ипрограммэ Мыекъопэ районым щыгъэцэкIагъэ зэрэхъурэм фэ­гъэ­хьыгъэ зэхэсыгъо мы мафэхэм поселкэу Тульскэм щыкIуагъ. Адыгэ Республикэм и Къэралыгъо Совет — Хасэм и Тхьаматэу Владимир Нарожнэр, ООО-у «Газпром межрегионгаз Майкоп» зыфиIорэм ипащэу Игорь Сырчиныр, АР-м экономикэ хэхъоныгъэмкIэ ыкIи сатыумкIэ иминистрэу Шэуджэн Заур, Мыекъопэ район администрацием ипащэ ипшъэрылъхэр зыгъэцэкIэрэ Сергей Жинжаровыр, нэмыкIхэри Iофтхьабзэм хэлэжьагъэх.

Шъугу къэдгъэкIыжьын, пар­тиеу «Единая Россия» зыфи­Iорэм игукъэкIыкIэ УФ-м и Президентэу Владимир Путиныр ыпкIэ хэмы­лъэу гъэстыныпхъэ шхъуантIэр участкэхэм ящэлIэгъэным фэгъэ­хьыгъэ хэбзэгъэуцугъэм кIэтхэгъагъ. Газификацием иапэрэ едзыгъо 2023-рэ илъэсым нэс агъэцэкIэщт, ятIо­нэрэр — 2030-м нэс зэшIохыгъэ хъущт.

Гъэстыныпхъэ шхъуантIэр ыпкIэ хэмылъэу унэе псэупIэхэм ящагухэм ящэлIэгъэным фэгъэ­хьыгъэу Мыекъопэ район администрацием ипащэ ипшъэрылъхэр зыгъэцэкIэрэ Сергей Жинжаровыр къэгущыIагъ.

— Мы программэм хэлэжьэщтхэм яспискэ, гъэстыныпхъэ шхъуантIэр унэхэм зэраращэ­лIэщт планыр зэхэтэгъэуцох. Ащ унэгъо 2903-рэ хэт, ау мы пчъагъэр зэхъокIын, джыри хэхъон ылъэкIыщт. ГъэрекIо бжыхьэм къыщегъэжьагъэу мы программэм шIуагъэу пылъыр цIыфхэм къафэтэIуатэ, ащ фэгъэхьыгъэ брошюрэхэр афэтэгощых, къэбар жъугъэм иамалхэр къызыфэдгъэфедэхэзэ нахь игъэкIотыгъэу ятэгъа­шIэ. Программэр щыIэныгъэм зэрэщыпхыращырэр, ыпкIэ хэмылъэу гъэстыныпхъэ шхъуан­тIэр псэупIэм къызэрэращалIэрэр залъэгъугъэм къы­щегъэжьагъэу лъэIу тхылъыр къэзытыхэрэм япчъагъэ зэхап­шIэу хэхъуагъ. ГущыIэм пае, бэ­дзэогъум ипэублэ лъэIу тхылъ 1253-рэ щыIагъэмэ, не­пэрэ мафэм ехъулIэу ар 1600-м нэсыгъ, — еIо Сергей Жинжаровым.

Владимир Нарожнэм мы Iоф­шIэным мэхьэнэ ин зэриIэр къыхигъэщызэ, ащ епхыгъэ къэ­барыр цIыфхэм икъоу алъагъэIэ­сынэу къоджэ псэупIэхэм япащэхэм афигъэпытагъ.

— Унагъо пэпчъ Iофым щыдгъэгъуазэмэ, программэм хэлажьэрэр нахьыбэ хъущт, планри игъом зэхэдгъэуцон тлъэкIыщт. ТиIофшIэн зэрэзэхатщэрэм елъытыгъ цIыфэу гъэстыныпхъэ шхъуантIэр зимыIэхэм ар зэралъыIэсыщтыр, — къыIуагъ Парламентым и Тхьаматэ.

ООО-у «Газпром межрегионгаз Майкоп» зыфиIорэм ипащэу Игорь Сырчиным къызэриIуагъэм­кIэ, ыпкIэ хэмылъэу гъэстыныпхъэ шхъуантIэр цIыфхэм аIэкIэгъэхьэгъэным ипрограммэ игъэ­цэкIэнкIэ Мыекъопэ районыр пстэуми апэ ит, сыда пIомэ мы муниципалитетым ипсэупIэхэр ары анахьэу ар зимыIэр. Мы Iофым цIыфхэр нахь чанэу къы­хэлэжьэнхэ, лъэIу тхылъхэр псынкIэу къатынхэ зэрэфаер ащ къыIуагъ.

— Къэралыгъом амалэу къы­тыгъэр тэжъугъэгъэфед, ыпэкIэ мыщ фэдэ щыIагъэп, ыпкIэ хэмылъэу гъэстыныпхъэ шхъуа­нтIэр псэупIэхэм аращалIэу къыхэкIыгъэп. Хэбзэгъэуцугъэу щыIэм диштэу, псэупIэр ыкIи чIыгу Iахьыр цIыфым тетхагъэхэмэ, бэ тыримыгъашIэу лъэIу тхылъыр къыхьын фае. Ащ тхылъыбэ ищыкIагъэп. ЦIыфхэм нахь загъэчанымэ, Iофхэр нахь псынкIэу лъыкIотэщтых, — къыIуагъ Игорь Сырчиным.

— Социальнэ газификацием ипрограммэ гъэцэкIагъэ зэрэхъурэм мэхьанэшхо иI, сыда пIомэ республикэм щыпсэурэ цIыфхэм ящыIэ­кIэ-псэукIэ нахьышIу шIыгъэныр, шъолъырым хэхъоныгъэхэр ышIынхэр, инвестициехэр хэлъхьэгъэнхэр ащ епхыгъ. УФ-м и Президент иунашъо Адыгеим щыгъэцэкIагъэ зэрэхъурэм АР-м и ЛIышъхьэ ынаIэ тет. Республикэм ипащэ иунашъо­кIэ гъот макIэ зиIэ унагъохэм, ветеранхэм, сэкъатныгъэ зиIэхэм рес­публикэ бюджетым къыхэхыгъэу IэпыIэгъу афэ­хъух. Унэм рагъэ­уцощт оборудованиер, гъэстыныпхъэр унэм зэрэращэлIэщт ахъщэр араты, — къыIуагъ Владимир Нарожнэм.

Зэхэсыгъом нэмыкI упчIэхэри къыщаIэтыгъэх. Мыекъопэ районым ипсэупIэхэм япащэхэр гумэкIыгъоу къэуцухэрэм къатегущыIагъэх, ахэр дэгъэзыжьыгъэнхэмкIэ шIэгъэн фаехэр агъэнэфагъэх.

ДЕЛЭКЪО Анет. Сурэтыр Iэшъынэ Аслъан тырихыгъ.