Тятэжъымэ тафэразэу ТырэгущыIэ адыгабзэм. Ошъогум ебыбэ бзыоу, Тыгъэм къыпэкIы нэбзыеу. КъыхэIукIы хы ШIуцIэм Иорхэр, гырзыхэу, Адыгэгур агъэузэу. Тилъэпкъэгъухэр арызэу, Къухьабэ IукIыжьыгъагъ ЦIэмэзы. Къэнэжьыгъэ тIэкIум, зыкъыгъэгъунэу, Сабыйхэр апIух, ашIы унэ. Тянэжъымэ афэдэкъабзэу, зы гущыIэ закъуи хэтымыгъэзэу, Къэтэгъэгъунэ адыгабзэр. Пхэлъыным пае Iэдэб ИщыкIагъэр бэу бэдэд. Уяни, уяти уагъасэ. Ины охъушъ, пшъхьэ фэошIыжьы уасэ. Ащ ыуж къэощэ шъхьэгъусэ. УашIыны пшIошIышъ мысэ, КъэпкIухьэрэп ар уигъусэу. Къыпхэмыфэныр бгъэкъагъэ — Ари щыщ адыгагъэм. * * * ЛъэкI бэдэд иIэр жабзэм. Акъыл зимыIэм, ар егъабзэ. ГукIэгъу зыхэлъыр рэубзэ. ТырыгущыIэнэу тыбзэ къабзэу — Джар тэжъугъэшIы шэн хабзэ. Гум ифабэ – бзэм ымакъ. ПIорэм загъорэ фэсакъ. ГущыIэр щэбзащэу быбын елъэкIы. ЕмыгъэшI цIыфым гухэкI. ШIу тэлъэгъу бзэр Ным фэдэкъабзэу. Сыд тIощтми Ащ тырэгъуазэ. Тыфегъасэ шэны-хабзэм. Бзэр урымыгущыIэмэ мэкIоды. КъырыпIон фай орэди. Зыгу къабзэм, дахэ ыбзэ. Сабыим шIоигъу уеубзэ. Ины охъуфэ рагъасэ, Губжымэ, ыгу регъэIасэ. ЩырэгущыIэх Адыгэ Хасэм. Тпсэ пэтыфэ, телъыщт тыбзэгу. Тигъэфэбэщт кIымафэм джэдыгоу, Къыригъэхьащтэп щтэ хъулъфыгъэм ыгу, ШIу ригъэлъэгъущт зэрыс чIыгур. Орэпшъашъэ, орэнысэ Къыгъэгъунэщт адыгэ намысыр. Бэ уигъэразэу ГущыIэу хэтыр тыбзэ: Зым ыIорэр мыхъунэу бгъугъазэ, ЗэдэгущыIэхэрэр зэхэкIыжьынхэу зэфэразэу. ЩыIэх цIыфхэр гущыIэм рыIазэу. * * * Къушъхьи, псыхъуи ацIэхэр адыгабзэу, Чылэхэр аIусыгъэх хъоибзэу. Ау цIэу яIэхэр зэблахъузэ, Къагъэнэжьыгъэхэр зырыз. АшIагъэм гур егъэузы. Ау тыщыIэщтэп, тызэплъэкIыжьызэ; Сабыйхэр тпIущтых IорышIэу, РыгущыIэхэу адыгабзэм. Адыгэхэр хъугъэх итэкъухьагъэ, Къагъэгъунэзэ яшъхьафитыныгъэ. Арысых хэгъэгу шъэныкъом ехъумэ. Бзэр зыщамыгъэгъупшэ ашIоигъу, къадэхъумэ. Ау зэрэфаеу афэгъэхъурэп. Рытхэнхэр хэгъэкIи, РыгущыIэнхэ алъэкIырэп. ЩыIэх ахэр хьазабым хэтхэу. * * * Ныдэлъфыбзэр умышIэрэми, лъым ар хэлъ. Ау ар зымышIэрэми НэмыкIэу еплъых. Ау ежьми гумэкIыр ыгу илъ: ЕшIэ зыгорэ зэрэкъолъыр. ЩыIэп къимыхъухьагъэ кушъэм, Зэхэзымыхыгъэ ным ыбзэ. Ныр къылъфыгъэм еубзэ: Пшъашъэр хъупхъэнэу, Шъаор лIы хъунэу. * * * Дунаим тет бзэжъхэм Ащыщэу алъытэ адыгабзэр. Унашъохэр рашIыщтыгъэх Ащ тятэжъхэм. КъыкъокIымэ пыир, КъэIущтыгъэ «О мардж!» джэмакъэр. Ыпсэ хаутыщтыгъ пый мэхъаджэм. ЩыIущтыгъ адыгабзэр ХыIушъуи, къушъхьи, къуладжи Ыгъэхъужьыщтыгъ, хъурэр сымаджэ. Лъэшэу гухэкI: Джы рыгущыIэрэр макIэ. Лъэпкъым иIэ лъэкIым Ащ лъэшэу хегъэкIы. Тятэжъ-тянэжъхэр Ащ лъэшэу егъэгумэкIых, Бзэр къагъэгъунэ зэрафэлъэкIэу. УгущыIэны хъумэ зафэу, Мэкъэ Iужъухэр зэхэтых хьарыфищэу: Ащ къикIырэп, ар зэбгъафэу, ЗэмыгъэшIэныр бзэр, удэшъхьахэу. ЦIыфыр имакI адыгэ лъэпкъым. ТыIууцуагъэу, тыIут нэпкъым МыIужь хъумэ адыгэ гущыIэ, Сыд пкIэ иIэжьа тэ тищыIакIэ? Зэрэдунаеу щашIэ адыгэ къуаер. ЦIыф щыIэн фаеп, шIоIаеу саер? Урысыбзэм хэхьагъ ГущыIэу «хьазырыр». Зыфэдэр щашIэ ар тыдрэ псэупIи. Сыд пай тщыгъупшэн фай Адэ адыгабзэр? ЩыIа адыгэ пшъашъэм Ынапэ нахь къабзэ? * * * Бэ лъэпкъэу исыр ти Урысые. Ахэтэп ахэм ыбзэ фэмые. Адэ тыбзэ шъхьафитэу ЗэдгъэшIэн тыфитмэ, Фетэу тшIыгъэу, сыда тыхэта? Iэпкъ-лъэпкъэу уиIэхэр ПфэIона уимыеу? Уимыныдэлъфыбзэр Фэдэ къабз протезым. Огъэфедэ, уфэразэу. Ау зыгорэм угу къефызы. Лъэпкъ инымэ тафэдэу, ТыщыжъугъаI, тыгухэр тымыгъэкIодэу. Дунаим тет цIыфхэр зэфэдэх. Адыгабзэр дгъэфедэу, Тыжъугъэпсэу, тшIэзэ тшъхьэ ифедэ. Бэдэдэ хъун тшIыгъэ чIэнагъэ. Къэтэжъугъэгъунэба къытфэнагъэр. * * * Тщыгъупшэ хъущтэп Нэгъумэ Шорэ. Ар лъэшы дэдэу гуIагъэ бэрэ. ТыбзэкIэ тхыгъэ ТиIэ шIоигъоу. Зэхигъэуцуагъ Адыгэ тхыбзэр. ШIоигъуагъ илъэпкъы ИIэнэу шIэныгъэ. Ауж къимынэу Дунаим тетмэ. * * * Джы тиIэ хъугъэх гимни, быракъи. Адыгабзэм теджэ, тызэфэсакъы. Зэкъошныгъэр тикIас. Джэнэт чIыгу тызэрысыр. ИкIыжьыгъэхэр къытэхъуапсэх. АшIэ: мыкIэ щыI алъапсэ. ТиIэ хъугъэ къэрал шIыкIэ. Ащ тыщэгугъы бэдэдэкIэ. Сезэщырэп Алахьым селъэIунэу, Адыгагъэр тхигъэлъынэу. Ау икъурэп лIэIу закъор. МакIэп тэри тшIэн фаер. Тисабыйхэр тпIунхэу, дгъэсэнхэу, Тижъхэр зэрэтIыгъхэр ТIорэп тшIокъинэу. Къагъэгъунэу адыгэ намысыр Типшъашъэхэр фэдгъэсэнхэу, Яхэгъэгу хэтIагъэу апсэ, ТикIалэмэ ашъхьэ уасэ фашIын. Уайкъокъо Рэмэзан.