Къыблэ ыкIи Темыр-Кавказ федеральнэ шъолъырхэм ягуфакIохэм я Форум бэдзэогъум и 19-м къыщегъэжьагъэу и 22-м нэс Адыгеим щыкIуагъ.

Iофтхьабзэм хэлэжьагъэх Урысыем ишъолъыр зэфэшъхьафхэм къарыкIыгъэхэ гуфэкIо чанхэр, волонтер организациехэм япащэхэр, хэбзэ къулы­къухэм ялIыкIохэр, нэмыкIхэри. НыбжьыкIэхэр Урысыем ишъо­лъыр 15-мэ къарыкIыгъэх, зэ­кIэмкIи ахэм япчъагъэ нэбгыри 300 хъущтыгъэ. Мэфищым къыкIоцI шъолъыр клубхэм ялIыкIохэр, волонтер объеди­нениехэм япащэхэр ыкIи ныбжьыкIэ организациехэм яактивистхэр яIэпэIэсэныгъэкIэ зэ­хъожьыгъэх.

Форумым ипрограммэ къызыпкъырыкIырэр ыкIи ащ хэлажьэхэрэр зэзыпхыхэрэр «Мы — развитие региона» зыфиIорэ гупшысэр ары. Мы IофтхьабзэмкIэ зэхэщакIохэм мурадэу яIэр — шъолъыр пэпчъ ыкIи хэ­гъэгум зэрэпсаоу хэхъоныгъэ ашIынымкIэ программэм хэла­жьэхэрэм амалэу яIэхэр къыхэ­гъэщыгъэнхэр, гуфакIохэм (во­лонтерхэм) яIофшIэн зе­гъэу­шъомбгъугъэныр, ахэм яIоф­шIэнкIэ амалэу яIэхэм ахэ­гъэ­хъогъэныр, IэпэIэсэны­гъэу аIэ­кIэлъхэмкIэ зэхъожьыгъэнхэр.

Форумым икъызэIухын фэ­гъэхьыгъэ Iофтхьабзэу бэдзэ­огъум и 19-м щыIагъэм хэлэ­жьагъ АР-м и ЛIышъхьэу КъумпIыл Мурат. ЩыIэныгъэм чанэу хэлажьэхэрэ гуфакIохэм за­къыфигъази социальнэ лъэныкъо зэфэшъхьафхэмкIэ тикъэралыгъо иобщественнэ щыIакIэ чанэу зэрахэлажьэхэрэр шIукIэ къафилъэгъугъ. ГуфакIохэм япчъа­гъэ хэгъэгум нахьыбэ зэрэщы­хъурэр, общественнэ IофшIэным хэлажьэхэрэм къазэрэха­хъорэр къыхигъэщызэ ныбжьыкIэхэм ирэзэныгъэ гущыIэхэр апигъохыгъэх.

Нэужым, бэдзэогъум и 20-м гуфакIохэр зыхэлэжьэгъэхэ пленарнэ зэхэсыгъоу «Основные тренды в развитии добровольчества» зыфиIорэр Адыгэ къэралыгъо университетым щы­кIуагъ. Iофтхьабзэм къекIо­лIагъэх АР-м гъэсэныгъэмрэ шIэныгъэмрэкIэ иминистрэ игуа­дзэу Пэрэныкъо Сусанэ, Урысыем иныбжьыкIэхэм ягупчэу «Добро» зыфиIорэм ипащэу Анна Захматовар, шъолъыр хэхъоныгъэмкIэ гъэIорышIапIэм ипащэу Кристина Канскаяр, Урысые Къащ Плъыжьым иправление итхьаматэ игуадзэу Александр Плаксиныр.

Адыгэ къэралыгъо универ­ситетым ыцIэкIэ форумым хэлэжьагъ филологиемкIэ фа­культетым ия 3-рэ курс истуденткэу Алина Кондратьевар. Ащ IэпыIэгъу фэхъугъэх университетым истудентхэм яныбжьыкIэ организацие хэтхэр. Университетым истудент во­лонтерхэр ренэу федеральнэ, шъо­лъыр ыкIи апшъэрэ еджапIэхэм азыфагу щыкIорэ Iоф­тхьабзэхэм чанэу ахэлажьэх. 2021-рэ илъэсым нэбгырэ 800-м нахьыбэ социальнэ мэхьанэ зиIэ Iофтхьэбзэ 20-м ехъумэ ахэлэжьагъэх. Мыхэм ащыщэу студент нэбгыри 5-мэ «За бескорыстный вклад в организацию Общероссийской акции взаимопомощи» зыфиIорэ УФ-м и Президент инэпэеплъ медалыр ыкIи щытхъу тхылъхэр, нэбгыри 9-мэ АР-м и ЛIышъхьэ ирэзэныгъэ тхылъхэр къафа­гъэшъошагъэх.

ГуфакIохэм сымаджэхэм, зыныбжь хэкIотэгъэ шъхьэза­къохэм анаIэ атырагъэты, колл-гупчэхэм Iоф ащашIэ, культурнэ, спорт ыкIи общественнэ Iофтхьабзэхэм язэхэщэн хэла­жьэх, ошIэ-дэмышIагъэ зыхэлъ тхьамыкIагъом хэфагъэхэм IэпыIэгъу араты.

Анна Захматовам къызэри­IуагъэмкIэ, волонтер сообщест­вэм хэтхэр шIушIэ IэпыIэгъум зызэрэрагъэушъомбгъущтым те­­гущыIагъэх. ГуфакIохэм япчъа­гъэ нахьыбэ хъунымкIэ яIофшIэн зэIухыгъэу щытыным мэхьанэшхо зэриIэр къыкIигъэтхъыгъ. Анахь шъхьаIэу къыхигъэщыгъэр къэралыгъом ынаIэ къазэрэтыригъэтырэр ыкIи грант IэпыIэгъухэр къызэраритырэр ары. Ащ ишIуагъэкIэ шъолъыр зэфэшъхьафхэм ягуфит ныбжьыкIэхэр зэIукIэнхэ ыкIи Iэпэ­Iэсэныгъэу аIэкIэлъхэмкIэ зэ­хъожьынхэ алъэкIы.

Общественнэ объединениехэм анэмыкIэу форумым хэлэ­жьагъ шIушIэным фэгъэзэгъэ Урысые Къащ Плъыжьыр. Мы организацием ипащэ игуадзэу А. Плаксиным къызэриIуагъэмкIэ, аужырэ илъэсхэм гуфакIо организациехэм Урысыем мэхьанэшхо щыраты хъугъэ, ащ уигъэгушIонэу щыт.

— ГуфакIохэм ягупчэу «Адыге­им иволонтерхэр» зыфиIорэм иIофшIэн сшIогъэшIэгъонэу зыщызгъэгъозагъ. Iэпэ­Iэсэныгъэу сIэкIэлъ хъугъэмкIэ сызыщыщ республикэм иныбжьыкIэхэм садэгощэн слъэкIыщт ыкIи Адыгеим щагъэфедэрэ шIыкIакIэхэр тиIофшIэн хэдгъэ­хьащтых, ащ ишIуагъэ къызэ­рэкIощтыми щэч хэлъэп, — къы­Iуагъ Дэгъыстан Республикэм илIыкIо куп ипащэу А. Абдурахмановым.

Урысыем иволонтер движение социальнэ мэхьанэ иI. Мыщ ныбжьыкIэ ыкIи студент закъо­хэр арэп зэрипхырэр, ныбжь зиIэхэр ыкIи щыIэныгъэм зыкъы­щызыгъэлъэгъуагъэхэр хэтых. Бысымхэр дахэу къазэрапэгъокIыгъэхэр форумым хэлэжьагъэхэм къыхагъэщыгъ. Ахэр адыгэ лъэпкъ культурэм нэIуасэ фашIыгъэх, КъокIыпIэм щы­псэурэ лъэпкъхэм яискусствэкIэ Къэралыгъо музеим и Темыр Кавказ къутамэу Мыекъуапэ дэтым, АР-м и Лъэпкъ музей ащагъэх, зекIо проектэу «Долина Мые — любить и знать свой город» зыфиIорэм нэIуасэ фашIыгъэх, театрэм щыIагъэх.

Волонтерхэм анахьэу агу къи­нэжьыгъэр Къэралыгъо академическэ ансамблэу «Налмэсым» къытыгъэ концертыр ары.

КIАРЭ Фатим.