ЫпшъэкIэ зигугъу къэтшIыгъэ Комиссием изэ­хэсыгъо гъогурыкIоныр щынэгъончъэнымкIэ Iофыгъоу къэуцухэрэм щатегущыIагъэх ыкIи мы лъэныкъомкIэ 2022-рэ илъэсым имэзих изэфэхьысыжьхэр щашIыгъэх.

Урысые общественнэ организациеу «Урысыем июристхэм я Ассоциацие» зыфиIорэм и Адыгэ шъолъыр къутамэ игъэ­кIотыгъэ зэхэсыгъо иIагъ. Iоф­тхьабзэм хэлэжьагъэх Адыгэ шъолъыр къутамэм и Тхьаматэ, ащ и Совет ыкIи игъэцэкIэкIо комитет хэтхэр, АР-м и Очыл палатэ итхьаматэу Ма­мый Алый.

АР-м и ЛIышъхьэу КъумпIыл Мурат ишIуфэс гущыIэмкIэ зэ­хэсыгъом хэлажьэхэрэм за­къыфигъэзагъ АР-м и Къэралыгъо Совет — Хасэм и Тхьа­матэу Владимир Нарожнэм.

— Ассоциацием иIофшIэн зыригъэжьагъэм къыщыублагъэу гъэхъагъэхэр ышIыгъэх, Адыгэ Республикэм социальнэ ыкIи экономикэ хэхъоныгъэхэр ышIынхэм, шъолъырым зыпкъитыныгъэ иIэным иIахьышIу хишIыхьагъ. Джащ фэдэу цIыф­хэм юридическэ IэпыIэгъу ягъэгъотыгъэнымкIэ, правэмкIэ яшIэныгъэхэм ахагъэхъонымкIэ Ассоциациер IэпыIэгъушIоу щыт. Сыд фэдэрэ лъэныкъокIи хэ­бзэгъэуцухэм пшъэрылъ шъхьа­Iэу яIэр цIыфхэм яхэбзэ фи­тыныгъэхэр ыкIи яшIоигъоны­гъэхэр къэухъумэгъэныр ары, — къыIуагъ В. Нарожнэм.

Нэужым Урысые общественнэ организациеу «Урысыем июристхэм я Ассоциацие» зыфиIорэм и Адыгэ шъолъыр къутамэ 2021-рэ илъэсым иIоф­шIэн зыфэдагъэм къытегущы­Iагъ ащ и Тхьаматэу Лъэхъэтыкъо Аскэр. Ащ къызэриIуагъэмкIэ, къутамэм нэбгырэ 310-рэ хэт. Мазэ къэс гъэцэкIэкIо комитетым зэхэсыгъохэр зэхещэх. ЫпкIэ зыхэмылъ юридическэ IэпыIэгъур республикэм щы­псэухэрэм арагъэгъотынымкIэ гъэрекIо Ассоциацием Iофышхо ышIагъ. Къутамэм игупчэ 19-мэ ыкIи чIыпэ отделении 3-мэ ыпкIэ зыхэмылъ юридическэ IэпыIэгъу ащарагъэгъоты. Блэ­кIыгъэ илъэсым мыщ фэдэ Iоф­тхьэбзи 4 афызэхащагъ, а мафэхэм зэкIэмкIи нэбгырэ 200-м ехъумэ закъыфагъэзагъ. Джащ фэдэу Адыгэ шъолъыр къутамэм политическэ партиеу «Единэ Россиер» игъусэу видеоконференцие шIыкIэм тетэу дежурствэхэр зэхещэх. Ащ фэдэ шIыкIэмкIэ 2021-рэ илъэсым нэбгырэ 400-м ехъумэ ыпкIэ зыхэмылъ юридическэ IэпыIэгъу арагъэгъотыгъ.

— 2022-рэ илъэсым мэкъуогъум илъэс 15 хъугъэ Урысые общественнэ организациеу «Уры­сыем июристхэм я Ассоциацие» зыфиIорэм и Адыгэ шъолъыр къутамэ Iоф зишIэрэр. Мы мафэм ехъулIэу нэбгырэ 300-м ехъу тиорганизацие хэт. Ахэм ахэтых хьыкумым иIофы­шIэхэр, кIэлэегъаджэхэр, нэмыкI IофшIапIэхэм аIутхэу юристэу Iоф зышIэхэрэр. А уахътэм къыщыублагъэу бэ Iо­фэу тшIагъэр, къыддэхъугъэри макIэп. Илъэс къэс нэбгырэ 400-м ехъу­мэ ыпкIэ зыхэмылъ юридическэ IэпыIэгъур ятэгъэгъоты. Организацием пшъэрылъ шъхьаIэу иIэр ыпкIэ зыхэмылъ юридическэ IэпыIэгъур цIыфхэм ягъэгъотыгъэныр, правэмкIэ яшIэныгъэхэр аушэтынхэмкIэ илъэс къэс диктантхэр ягъэтхы­гъэныр, юрист сэнэхьатымимэ­хьанэ къэIэтыгъэныр, къэра­лы­гъом ыкIи обществэм апа­шъ­хьэкIэ япшъэрылъхэр зы­фэ­дэ­хэр юрист ныбжьыкIэхэм агу­ры­гъэ­Iогъэныр ыкIи яIофшIэн кIэгъэгушIугъэнхэр ары. Мы мафэхэм анахь Iофыгъо шъхьаIэу тынаIэ зытетхэм ащыщ Луганскэ ыкIи Донецкэ народнэ республикэхэм къарыкIыгъэхэм юриди­ческэ IэпыIэгъу ягъэгъотыгъэ­ныр. ЗэкIэмкIи ахэм япчъагъэ нэ­бгы­рэ 1647-рэ мэхъу, ахэм ащы­щэу нэбгырэ 464-р кIэлэцIыкIух. Мыхэм «статус беженца» зыфиIорэр зэрагъэпсыщтым иIофыгъохэмкIи тишIуагъэ ядгъэкIыщт, — къыIуагъ Лъэ­хъэтыкъо Аскэр.

Джащ фэдэу зэхэсыгъом къы­щыгущыIагъэх АР-м и Апшъэрэ хьыкум и Тхьаматэу Б. Шумэныр, къутамэм ичIыпIэ отделениехэу Адыгэкъалэ, Теуцожь районым, Мыекъуапэ ащыIэхэм япащэхэр.

Донецкэ ыкIи Луганскэ народнэ республикэхэм къары­кIыгъэхэм ыпкIэ зыхэмылъ юридическэ IэпыIэгъу зэрэрагъэгъотырэм, ахэм фитыныгъэу яIэхэр зэрытхэгъэ ыкIи узы­гъэгъозэрэ брошюрэу къыда­гъэкIыгъэм игугъу къышIыгъ Мамрыкъо Людмилэ.

КIэухым зиIофшIэнкIэ къа­хэщыгъэхэу Урысые общественнэ организациеу «Урысыем июристхэм я Ассоциацие» зыфиIорэм и Адыгэ шъолъыр къутамэ хэт­хэм щытхъу тхылъхэр аратыжьыгъэх.

КIАРЭ Фатим.