АР-м хэдзынхэмкIэ и Гупчэ комиссие мы мафэхэм зэхэсыгъо иIагъ. Iофыгъо 8-мэ ащ щатегущыIагъэх, унэшъо гъэнэфагъэхэр ашIыгъэх. Зэхэсыгъор зэрищагъ АР-м хэдзынхэмкIэ и Гупчэ комиссие и Тхьа­матэу Сэмэгу Нурбый.

АР-м и Къэралыгъо Совет — Хасэм идепутатыгъэу Тэ­хъу­тэмыкъое районымкIэ зы мандат зиIэ хэдзыпIэ коеу N 21-м щыIэгъэ Шъэо Аскэр мы муниципалитетым иадми­нистрацие ипащэу зэрагъэнэфагъэм къы­хэкIыкIэ имандат къы­гъэтIы­лъыгъ. Ащ къыкIэлъы­кIоу хэдзын тедзэхэр Iоныгъо мазэм зэхащэ­щтых. Мы хэдзыпIэ коим идепутатэу хэдзыгъэнымкIэ Валентина Чугуновар (политическэ партиеу ЛДПР-м), ПщыукI Алый (политическэ партиеу «Единэ Россием)» къагъэлъэгъуагъэх, комиссием хэтхэм кандидат-­ хэм адырагъэштагъ.

Хэдзын тедзэхэм языфэгъэ­хьазырын, Тэхъутэмыкъое районым хэдзынхэмкIэ ичIыпIэ комиссие IофшIэныр зэрэзэхищэщтыр, бюллетеньхэм ягъэхьазырын нэужым тегущыIагъэх.

— Iоныгъо мазэм Адыгэ Республикэм хэдзынхэмкIэ кампание 43-рэ щыкIощт. АР-м и Къэралыгъо Совет — Хасэм Тэхъутэмыкъое районымкIэ зы мандат зиIэ хэдзыпIэ коеу N 21-м идепутат хадзыщт, чIыпIэ мэхьанэ зиIэ кампание 42-рэ муниципалитетхэм ащыкIощт. Хэдзынхэм языфэгъэхьазырын АР-м хэдзынхэмкIэ и Гупчэ комиссие ипшъэрылъ. ЧIыпIэ комиссиеу 8 зэхащагъ, Мыекъуапэ нэмыкIэу муниципа­литетхэм зэкIэми хэдзынхэр ащыкIощт. Бэдзэогъум и 21-м ехъулIэу депутат мандат 531-м нэбгырэ 1359-рэ ит. Кандидати 114-м ежь-ежьырэу зыкъагъэлъэгъуагъ, 1245-р политическэ партиехэм ялIыкIох. Тэхъутэмы­къое районымкIэ хэдзын тедзэм нэбгыритIумэ зыкъыщагъэлъэгъуагъ. Бэдзэогъум и 27-р кан­дидатхэм ятхынкIэ аужырэ маф. Джырэ уахътэ хэдзынхэм язы­фэ­гъэхьазырын зэрэлъыкIуатэ­рэм ымыгъэразэу зи къытэолIагъэп, — еIо АР-м хэдзынхэмкIэ и Гупчэ комиссие исекретарэу ХьацIэцIэ Фатимэ.

ДЕЛЭКЪО Анет.