Социальнэ зэзэгъыныгъэм шIуагъэ къытэу республикэм Iоф зэрэщишIэ­рэм мэхьанэшхо иI. Аужырэ илъэситIум ар къызфэзгъэфедэхэрэм япчъагъэ зэхапшIэу хэхъуагъ.

Республикэм игъогухэм къащыхъурэ тхьамыкIэгъо хъугъэ­-шIагъэхэм къакIичынымкIэ хэпшIыкIэу яшIуагъэ къэкIощт гъогухэм язытет нахьышIу шIыгъэнымкIэ Iофтхьабзэхэу зэрахьэхэрэм. Адыгэ Республикэм игъогухэм ящынэгъончъагъэкIэ Комиссием изэхэсыгъоу щыIагъэм хэлэжьагъэхэр ащ фэдэ зэфэхьысыжьым къыфэкIуагъэх. Адыгеим и ЛIышъхьэу КъумпIыл Мурат пшъэрылъ къы­зэрэфишIыгъэм тетэу респуб­ликэм и Премьер-министрэ ипшъэрылъхэр зыгъэцэкIэрэ КIэ­рэщэ Анзаур зэIукIэр зэрищагъ. Iофтхьабзэм хэлэжьагъ АР-м и Къэралыгъо Совет — Хасэм и Тхьаматэу Владимир Нарожнэр.

Лъэпкъ проектэу «Щынэгъончъэ ыкIи шэпхъэшIухэм адиштэрэ автомобиль гъогухэр» зыфи­Iорэм игъэцэкIэн зэрэкIорэм ехьылIагъэу къыIотагъ «Адыгея­автодорым» ипащэу Алексей Корешкиным. Ащ къызэрэхигъэ­щыгъэмкIэ, 2022-рэ илъэсым лъэпкъ проектым сомэ миллиарди 3,6-м ехъу пэIуагъэхьанэу щыт. Республикэ ыкIи чIыпIэ сетымкIэ контрактациер проценти 100-кIэ гъэцэкIагъэ хъугъэ. Графикым ыпэ итхэу Iоф­шIэнхэр зэшIуахых. Гъогу Iахь 60-мэ IофшIэнхэр ащагъэцэкIэнхэу щыт: Iахь 31-р — респуб­ликэ гъогум щыщ, 3-р — псэу­пIэу Яблоновскэм игъогухэм ащыщых, 26-р — къалэу Мые­къуапэ иурамхэм ахэхьэх. Рес­публикэ гъогухэм яIахьи 5-мэ, джащ фэдэу къалэу Мыекъуапэ игъогухэм яIахь 20-мэ IофшIэнхэр ащагъэцэкIагъэх.

Проектышхохэм язэшIохын зэрэкIорэми мы зэхэсыгъом щатегущыIагъэх. Автомобиль гъогоу «Инэм — БжыхьэкъоякIэр» зыфиIорэм сомэ миллиарди 3 фэдиз зыпэIухьащт транспорт зэхэкIыпIэм ишIын щылъэкIуатэ. Процент 73-м нэ­сыгъ техническэ лъэныкъомкIэ ащ иухьазырын. ИпIалъэм къы­пэу — Адыгеим къэралыгъо гъэпсыкIэ иIэ зыхъугъэм ия 100-рэ илъэс ихэгъэунэфыкIын зыщыкIощтым — 2022-рэ илъэ­сым чъэпыогъум зэхэкIыпIэм ишIын аухынэу рахъухьагъ. Джащ фэдэу республикэм июби­лей ехъулIэу чъэпыогъум гъогу псэолъи 2 атыщт: ар автомобиль гъогоу «Къалэу Мыекъуапэ къыщызыухьащтым» ия 3-рэ чэзыу, джащ фэдэу Мыекъопэ районымкIэ щыIэ автомобиль гъогоу «Черниговская — Ты­гъэмыпс» зыфиIорэм километри 10 хъурэ изы Iахь.

Ащ нэфэшъхьафэу Росавтодорым зэзэгъыныгъэ зэрэдашIыгъэм тетэу лъэмыджхэри зыпкъ рагъэуцожьыщтых. Мы илъэсым псэолъи 3-мэ апэIуагъэхьанэу сомэ миллиони 169,8-рэ къыхагъэкIыгъ. Автомобиль гъогоу «Красногвардейскэр — Улап — Зарево» зыфиIорэм илъэмыджитIу, автомобиль гъогоу «Абадзехскэр — Новосвободнэр» зыфиIорэм изы лъэмыдж игъэкIотыгъэу агъэцэкIэжьых.

Программэу «Къуаджэхэм яхэхъоныгъ» зыфиIорэм диштэу гъогухэм ягъэцэкIэжьынкIэ Iоф­шIэнышхо зэшIуахынэу рахъу­хьагъ. Мы илъэсым а гухэлъхэм сомэ миллион 273,5-м ехъу апэIуагъэхьащт. Муниципальнэ образовании 4-мэ чIыпIэ мэхьанэ зиIэ гъогухэр ащашIыщтых ыкIи ащагъэцэкIэжьыщтых: Мые­къопэ ыкIи Шэуджэн районхэм псэолъэ зырыз, Кощхьэблэ районым — 2, Красногвардейскэ районым — 3.

Лъэпкъ проектым тегъэпсы­хьагъэу Iофтхьабзэхэу зэшIуа­хыхэрэм афэгъэхьыгъэу игъэ­кIотыгъэу къаIотагъ къалэу Мыекъуапэ ипащэу Геннадий Митрофановымрэ Тэхъутэмыкъое районым ипащэу Шъэо Аскэррэ. ЗэрэхагъэунэфыкIы­гъэмкIэ, шышъхьэIум ыгузэгу­хэм адэжь загъэцэкIэжьырэ нэужым Октябрьскэ дамбэр къызэIуа­хыжьыщт, ау автомобиль псын­кIэхэм апае ныIэп.

«Гъогухэм ягъэцэкIэжьын мылъкушхо къыфыхагъэкIы. ИщыкIагъэр игъом ар аIэ къырагъэхьаныр ыкIи икъоу Iоф­шIэнхэр агъэцэкIэнхэр ары. Гъогухэм ягъэцэкIэжьын дакIоу общественнэ чIыпIэхэр зэте­гъэпсыхьэгъэнхэр, тротуархэр гъэцэкIэжьыгъэнхэр, урамхэр тэрэзэу къагъэнэфынхэр зыщагъэгъупшэ хъущтэп. Республи­кэм и ЛIышъхьэу КъумпIыл Мурат ащ фэдэ пшъэрылъ къе­гъэуцу», — къыхигъэщыгъ КIэ­рэщэ Анзаур.

Ащ нэужым къуаджэу АдыгеякIэм иурамэу Бжыхьэкъуаер зэтегъэпсыхьэгъэным, транспорт зэхэкIыпIэм дэжь автомобиль гъогур шIыгъэныр къыдэзы­лъытэхэрэ проектхэм япхыгъэ Iофыгъом хэплъагъэх. псэупIэу Гъозэрыплъэ къекIолIэрэ къу­шъхьэлъэ гъогум игъэцэкIэжьын, псэупIэу Каменномостскэм транспортым ионтэгъугъэ зыщашыщт автоматическэ пост гъэуцугъэнэу зэхэсыгъом игъо щалъэгъугъ. Свято-Михайловскэ чылысым къекIолIэрэ гъогум хьылъэзещэ машинэхэр зэрэ­рыкIохэрэм лъыплъэгъэнымкIэ пшъэрылъхэр афашIыгъэх.

Зэхэсыгъом икIэухым лъэпкъ проектыр гъэцэкIагъэ зэрэхъущтым, гъогухэм анахь чIыпIэ дэйхэу яIэхэм къащыхъурэ тхьа­мыкIагъохэм къакIегъэчыгъэным, гъогузекIонымкIэ шапхъэ­хэр гъэцэкIагъэ зэрэхъухэрэр уплъэкIугъэным япхыгъэ унэшъо заулэ аштагъ.

АР-м и ЛIышъхьэ ипресс-къулыкъу