ЫпшъэкIэ зигугъу къэтшIыгъэ Комиссием изэхэсыгъо гъогурыкIоныр щынэгъончъэнымкIэ Iофыгъоу къэуцухэрэм щатегущыIагъэх ыкIи мы лъэныкъомкIэ 2022-рэ илъэсым имэзих изэфэхьысыжьхэр щашIыгъэх.

Илъэсныкъом тишъолъыр игъогухэм къатехъухьэгъэ хъугъэ-шIагъэхэм япхыгъэу къэ­гущыIагъ АР-м хэгъэгу кIоцI IофхэмкIэ и Министерствэ гъо­гурыкIоныр щынэгъончъэнымкIэ и Къэралыгъо автоинспекцие и ГъэIорышIапIэ ипащэ ипшъэ­рылъхэр зыгъэцэкIэрэ Хъунэго Махьмуд.

Ащ къызэриIуагъэмкIэ, блэ­кIыгъэ илъэсым мыщ фэдэ иуахътэ егъэпшагъэмэ, хъугъэ­шIагъэхэм япчъагъэ проценти 5,2-кIэ нахь макIэ хъугъэ. Джащ фэдэу авариехэм ахэкIодагъэ­хэм ыкIи шъобж ахэзыхыгъэхэм япчъагъэ къыщыкIагъ. Мыщ дэжьым гумэкIыгъо зыдэщыIэу къыгъэнэфагъэр Мыекъопэ ыкIи Теуцожь районхэр ары.

Хъунэго Махьмуд къызэ­рэхигъэщыгъэмкIэ, хъугъэ-шIагъэхэм япчъагъэ нахь макIэ хъуным пае пэшIорыгъэшъ Iоф­тхьабзэхэр зэхащэнхэм, гъог­у­хэм видеокамерэхэр нахьыбэу ащагъэуцунхэм мэхьанэшхо иI. Непэрэ мафэм ехъулIэу сурэт ыкIи видео тезыхырэ пкъыгъуи 114-рэ республикэм игъогухэм атет. Бэдзэогъум мазэм а пчъа­гъэм джыри 18 хагъэхъощт. Ешъуагъэу рулым кIэрытIысхьэ­хэрэм пшъэдэкIыжь ягъэхьы­гъэныр пшъэрылъ шъхьаIэхэм ащыщ.

Гъогухэм къатехъухьэгъэ хъугъэ-шIагъэхэм шъобж ахэзыхыгъэхэм медицинэ IэпыIэгъу ягъэгъотыгъэнымкIэ Iофэу ашIэ­рэм къытегущыIагъ Адыгеим псауныгъэр къэухъумэгъэнымкIэ иминистрэу Мэрэтыкъо Рустем. Мы илъэсныкъом шъолъырым игъогухэм аварие 299-рэ къащыхъугъ, ахэм ахэфагъэхэм медицинэ IэпыIэгъу ящыкIэ­гъагъ. ГумэкIыгъоу къэуцухэрэр дэгъэ­зыжьыгъэнхэм фэшI къулыкъу зэфэшъхьафхэм яIо зэ­хэлъэу Iоф зэдашIэным мэхьа­нэшхо иIэу министрэм хигъэунэфы­кIыгъ.

АР-м и ЛIышъхьэ ипресс-къулыкъу