Лъэпкъ проектэу «Щынэгъончъэ ыкIи шэпхъэшIухэм адиштэрэ гъо­гухэр» зыфиIорэм ишIуагъэкIэ автомобиль гъогоу «Красногвардейскэр — Улап — Зарево» зыфиIорэм ия 23 километрэ дэжь пхырыкIырэ лъэмыджэу псыхъоу Псынэф телъым мы уахътэм етIупщыгъэу гъэцэкIэжьын IофшIэнхэр рашIылIэх.

Гъэмэфэ лъэхъаным псыхъо­хэм адэт псыр нахь макIэ зэрэ­хъурэр подрядчикым къызфигъэ­феди, IофшIэнхэм ауж ихьагъ. ОАО-у «Ростовавтомост» зыфи­Iо­рэм илъэмыджышIхэм яIоф­шIакIэ Адыгеим щызэлъашIагъ. Республикэм игъогу фонд къы­хэ­­хыгъэ ахъщэмкIэ Мыекъопэ районым бэмышIэу щагъэцэкIэ­жьыгъэ лъэмыджхэр мы организацием иIофшIагъэх. Псынэф телъ лъэмыджыр игъэкIотыгъэу зэрагъэцэкIэжьыщт зэзэгъыныгъэм псэолъэшI организацием дыкIэтхагъэх. Лъэпкъ проектэу «Щынэгъончъэ ыкIи шэпхъэшIухэм ади­штэрэ гъогухэр» зыфиIорэм ишIуагъэкIэ ащ пэIуагъэхьащт сомэ миллион 77,84-р къатIуп­шыгъ.

Лъэмыджыр лъэныкъуитIоу зэ­тыраутыгъэу зы бгъур джырэ уахътэм агъэцэкIэжьы. Псэуа­лъэр зыIыгъыр, ыбгъукIэ гогъэчъыхьэгъэ пкъэухэр, асфальтыр зэбла­хъущтых. ЗэфэшIыгъэ лъэныкъор нахь теIэтыкIыгъэщт, адрэ автомобильхэр зэрыкIохэрэм нахьи. Зы бгъур заухыкIэ, адрэм игъэцэкIэжьын фежьэщтых.

ЗэрагъэнафэрэмкIэ, мы илъэ­сым ыкIэм нэс мыщ нэмыкIэу джыри тишъолъыр ит лъэмыджитIу­мэ игъэкIотыгъэ гъэцэкIэжьынхэр арашIылIэнхэу агъэнафэ.