КъыдигъэкIырэм хегъахъо
ПшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Мыекъопэ машинэшI заводым» илъэсэу тызыхэтым имэзих манипулятор 320-рэ къыдигъэкIыгъ.
БлэкIыгъэ илъэсым мыщ фэдэ иуахътэ а пчъагъэр 130-рэ хъущтыгъэ. Продукциер зэкIэ IуагъэкIы. Ащ фэдэ къэбар къытыгъ предприятием игенеральнэ директорэу ЕмтIылъ Руслъан.
Ащ къызэриIуагъэмкIэ, тэрэзэу гъэпсыгъэ стратегическэ планым ишIуагъэкIэ мыщ фэдэ къэгъэлъэгъонхэм къафэкIуагъэх.
Непэрэ мафэм ехъулIэу заводым вакансие 16 иI. Апшъэрэ ыкIи гурыт хэушъхьафыкIыгъэ гъэсэныгъэ зиIэ специалистхэр ищыкIагъэх. Гурыт лэжьапкIэр сомэ мин 47-рэ мэхъу. Предприятием Iутхэм медицинэ фэIо-фашIэхэр афагъэцакIэх, зисэнэхьат хэшIыкIышхо фызиIэ специалистхэм — неврологым, кардиологым, стоматологым, терапевтым Iоф ашIэ. Игъом лэжьапкIэр араты, зыгъэпсэфыгъо уахътэм IофышIэхэр хы ШIуцIэ Iушъом агъакIох, ыпкIэ хэмылъэу мэфитфырэ ащ зыкъыщагъэпсэфын алъэкIы.
Гидроманипуляторхэм якъыдэгъэкIынкIэ Урысыем пэрытныгъэ щызыIыгъ предприятиеу щыт пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Мыекъопэ машинэшI заводыр». 1985-рэ илъэсым щегъэжьагъэу а лъагъом тет. Непэрэ мафэм ехъулIэу промышленностым щагъэфедэрэ пкъыгъо зэфэшъхьафхэр заводым къыдегъэкIых, ахэр чIыпIэ зэфэшъхьафхэм ащы-IуегъэкIы.