Къэралыгъо программэу «Тилъэпкъэгъухэу IэкIыб къэралхэм арысхэр ежьхэм яшIоигъоныгъэкIэ Адыгэ Республикэм къэкощыжьынхэмкIэ Iэпы­Iэгъу ятыгъэныр» зыфиIорэр пхырыщыгъэным иIофыгъохэм афэ­гъэ­зэгъэ межведомственнэ комиссием мы мафэхэм зэхэсыгъо иIагъ.

Адыгэ Республикэм лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр ар зэрищагъ.

Зэхахьэм А. Шъхьэлахъом къызэрэщиIуагъэу, 2019-рэ илъэ­сым къыщегъэжьагъэу къэралыгъо программэр Адыгеим щыпхыращы. IэкIыбым щыпсэурэ тилъэпкъэгъу нэбгырэ 60-мэ мы илъэсым шъолъырым къагъэзэжьынэу агъэнафэ. Джырэ уахътэ республикэм анахьэу ищыкIагъэхэр врачхэр, санитархэр, фельдшерхэр, шIэ­ны­гъэмрэ гъэсэныгъэмрэ яIофы­шIэхэр, лъэныкъо зэфэ­шъхьаф­хэм ащылэжьэн зы­лъэкIыщтхэ инженерхэр, менеджерхэр арых.

Ежьхэм яшIоигъоныгъэкIэ Адыгеим къэкIожьы зышIои­гъохэр бэ мэхъух, ау респуб­ликэр зыфэе кадрэхэм ахэр адиштэхэрэп, ащ фэшI джырэ уахътэ къырагъэблэгъэжьынхэу хъугорэп. Нэбгырэ 13-мэ ялъэIу тхылъхэм адырагъэштагъэп.

Бэдзэогъум и 1-м ехъулIэу АР-м хэгъэгу кIоцI IофхэмкIэ и Министерствэ миграцием ылъэ­ныкъокIэ и ГъэIорышIапIэ иучет нэбгыри 8 хэуцуагъ.

Ежьхэм яшIоигъоныгъэкIэ Адыгеим къэкIожьыщтхэм Iэпы­Iэгъу ятыгъэным фэгъэхьыгъэ доклад къышIыгъ межведомственнэ комиссием итхьаматэ игуадзэу Тхьаркъохъо Фатимэ.

ЦIыфхэм IофшIапIэ ягъэгъотыгъэнымкIэ федеральнэ къулы­къум и ГъэIорышIапIэу Адыгеим щыIэм ипащэу Галина Цыганковам мы лъэныкъомкIэ яIоф­шIэн зэрэзэхащэрэм къытегущыIагъ. Республикэм къэкIожьырэ тилъэпкъэгъухэм IэпыIэгъоу аратырэм, пшъэрылъэу къэуцухэрэм кIэухым Шъхьэлэхъо Аскэр къатегущыIагъ. ДЕЛЭКЪО Анет.