2020-рэ илъэсым имэлылъфэгъу мазэ къыщегъэжьагъэу сабый къызэрыхъухьэгъэ унагъоу ны мылъкум исерти­фикат къызтефэхэрэм тхылъхэр агъэхьазырынхэ ищыкIэ­гъэжьэп.

УФ-м ПенсиехэмкIэ ифонд испециалистхэм пэIудзыгъэ шIыкIэм тетэу афагъэхьазыры. ИлъэситIоу ащ ыуж тешIагъэм Адыгеим щыпсэурэ унэгъо 5415-мэ ащ тетэу афагъэпсыгъ.

КIэлэцIыкIур къызэрэ­хъугъэр, унагъом ны мылъкур къызэрэтефэрэр къэзыушыхьатырэ тхылъхэр ЗАГС-р ары фондым къыIэкIэзыгъахьэрэр. Ащ къыпкъырыкIхэзэ, нэмыкIэу ищыкIагъэхэр агъэ­псых. Сертификатыр зэ­рэ­хьазырыр ПенсиехэмкIэ фондым икъэбарлъыгъэIэс системэ щагъэна­фэшъ, къэралыгъо фэIо-фашIэхэм япортал е фондым иинтернет нэкIубгъо «унэе кабинетэу» ным щыриIэм агъахьы.

Джащ фэдэу ны мылъкум фэгъэхьыгъэ программэм кIэу къыхэхьагъэхэм ащыщ сертификатыр тхьапэм темытэу, электроннэ шIыкIэм тетэу зэрэгъэпсыгъэр. Ау ащ пае къэмынэу ным ищыкIагъэ зыхъукIэ тхьапэм тетэуи къаIихын ылъэкIыщт.

Сабыир ыпIунэу зыштэгъэ унагъохэм мы шап­хъэхэр анэсыхэрэп. Ахэм лъэIу тхылъыри, нэмыкIэу ищыкIагъэхэри ежьхэм ашъхьэкIэ рахьылIэн фае.