Адыгеир шIукIэ ашIэ
Бэдзэогъум и 21 — 25-м СССР-м изаслуженнэ тренерэу Кобл Якъубэ фэгъэхьыгъэ шIэжь Дунэе зэнэкъокъур дзюдомкIэ Мыекъуапэ зэрэщыкIощтым спортыр зышIогъэшIэгъонхэр къыкIэупчIэх.
Урысыем дзюдомкIэ и Федерацие зэнэкъокъум изэхэщэн кIэщакIо фэхъугъ. Ащ фэдэ спорт зэIукIэгъухэр дзюдомкIэ шъолъырхэм ащырагъэкIокIынхэм фэшI хэгъэгум дзюдомкIэ и Федерацие щыIэныгъэм щыщ лъэныкъуабэ къыделъытэ.
ДзюдомкIэ спорт еджэпIэ цIэрыIо шъолъырым иIэн фае. СССР-м, Урысыем дзюдомкIэ яшэн-хабзэхэр щагъэлъэпIэнхэр пшъэрылъ шъхьаIэхэм ащыщых. 2019-рэ илъэсым Урысыем и Кубок къыдэхыгъэным, 2021-рэ илъэсым Урысыем дзюдомкIэ изэнэкъокъу афэгъэхьыгъэ зэIукIэгъухэр Мыекъуапэ дэгъоу щыкIуагъэх, зэхэщакIохэм щысэшIу къагъэлъэгъуагъ.
Урысыем, Белоруссием япрофессиональнэ спортсмен анахь лъэшхэр Адыгеим щызэнэкъокъущтых.
Тюмень, Санкт-Петербург, Красноярскэ мыщ фэдэ зэнэкъокъу инхэр мыгъэ ащыкIуагъэх. Мыекъуапэ ыуж Челябинскэ, Екатеринбург, Казань дзюдомкIэ зэIукIэгъухэр ащызэхащэнхэ ямурад.
Дунаим щыцIэрыIу
Кобл Якъубэ СССР-м, Урысыем язаслуженнэ тренер, я ХХ-рэ лIэшIэгъум Урысыем дзюдомкIэ итренер анахь дэгъу. Адыгэ къэралыгъо университетым физкультурэмкIэ ыкIи дзюдомкIэ и Институт зэхищагъ, еджапIэм ипащэ хъугъэ. Ащ фэдэу нэмыкI
Институт дунаим тетэп.
СССР-м спортымкIэ изаслуженнэ мастер 11, спортымкIэ дунэе класс зиIэ мастер 60-м нахьыбэ, спортымкIэ мастер 300-м къехъу ыгъэсагъэх. Дунаим анахь щыцIэрыIо бэна- кIоу ыгъэсагъэр Владимир Невзоровыр ары. Советскэ СоюзымкIэ зэкIэми апэу дунаим дышъэр къыщыдихыгъ, Олимпиадэ джэгунхэу Монреаль 1976-рэ илъэсым щыкIуагъэхэм дышъэр къащихьыгъ.
Кобл Якъубэ ишIушIуагъэ Адыгеим щагъэлъапIэ. ЗычIэсыгъэ унэм мыжъобгъу къыщыфызэIуахыгъ, Мыекъуапэ ицIыф гъэшIуагъ. Спорт Унэшхом, дзюдомкIэ спорт еджапIэм Я. Коблым ыцIэ ахьы. Институтым шIэжь музееу къыщызэIуахыгъэр тренер цIэрыIом ищыIэныгъэ ехьылIагъ. АщкIэ АР-м и ЛIышъхьэ, Правительствэм тафэраз.
Бэнэгъухэр
Спорт Унэшхом зэнэкъокъухэр бэдзэогъум и 23 — 24-м щыкIощтых. Мафэм сыхьатыр 11-м рагъэжьэщтых. ЗэхэщакIохэм спортыр зышIогъэшIэгъонхэр рагъэблагъэх.