Зэшъхьэгъусэ цIэрыIохэм тарэгушхо
Зэшъхьэгъусэхэу культурэм, искусствэм Iоф ащызышIэхэрэм афэгъэхьыгъэ тхыгъэхэр тигъэзетеджэхэм ашIогъэшIэгъоных. Адыгэ Республикэм и Лъэпкъ театрэу Цэй Ибрахьимэ ыцIэ зыхьырэм 1976-рэ илъэсым къыщыублагъэу Кукэнэ Мурат щэлажьэ. Урысыем, Адыгеим янароднэ артист, Абхъазым, Пшызэ язаслуженнэ артист. Ащ ишъхьэгъусэу Хъунэго Саидэ Урысыем итхакIохэм я Союз хэт, Адыгэ Республикэм искусствэхэмкIэ изаслуженнэ IофышIэшху. Зыхьэ Заурбыйрэ Зыхьэ Мэлайчэтрэ Урысыем изаслуженнэ артистых, Адыгэ Республикэм инароднэ артистых. Зыхьэ Заурбый общественнэ IофшIэкIошху. Къэбэртэе-Бэлъкъарым, Абхъазым, Пшызэ язаслуженнэ артист. Зэшъхьэгъусэхэу Ацумыжъ Нурбыйрэ Даур Людмилэрэ театральнэ искусствэм щыцIэрыIох. Адыгэ Республикэм и Къэралыгъо академическэ къэшъокIо ансамблэу «Налмэсым» илъэсыбэрэ хэтыгъэх Адыгеим инароднэ артистхэу НэмытIэкъо Аслъанрэ Римэрэ, Къулэхэу Мыхьамэтрэ Мирэрэ. Ирина Доценкэмрэ Аркадий Кирносрэ сурэттех цIэрыIох. ЯIофшIагъэхэр Урысыем, IэкIыб хэгъэгухэм къащагъэлъагъох. Къэлэкъутэкъохэу Инвер ыкIи Асыет, Къэбэхьхэу Анзор ыкIи Евгения, Шэуджэнхэу Рустам ыкIи Юлианэ, Нэгъойхэу Азэмат ыкIи Зурет, нэмыкIхэм яшIушIагъэ тэгъэлъапIэ. Унэрэкъо Раисэрэ ГъукIэ Замудинрэ, Едыджхэу Мэмэтрэ Севилэрэ, Тэухэу Аслъанрэ Нуриетрэ, Ацумыжъхэу Аслъанрэ Сарэрэ, Бастэхэу Азмэтрэ Тыгъэнгуащэрэ, Алыбэрдхэу Адам ыкIи Саниет, Сулеймановхэу Юнысрэ Фатимэрэ, Аркадий ыкIи Татьяна Хуснияровхэм, фэшъхьафхэм лъэпкъ культурэм, искусствэм, гъэсэныгъэм лъэуж дахэ къащагъэнагъ. ЗыцIэ къетIогъэ зэшъхьэгъусэхэм, нэмыкIхэм яIофшIагъэ унэгъо пчъагъэхэм щысэшIу афэхъух. Унагъор пытэмэ, хэгъэгури пытэщт. Къэралыгъо гъэпсыкIэ иIэу Адыгеир зыпсэурэр илъэси 100 зэрэхъурэм тыпэгъокIызэ, унагъохэм ящыIэкIэ-псэукIэ хэхъоныгъэу афэхъухэрэм тегъэгушхо, янасып зыдалъэгъужьызэ бэгъашIэ хъунхэу афэтэIо.