Къыблэ ыкIи Темыр-Кавказ федеральнэ шъо­лъырхэм ягуфакIохэм я Форум Адыгеим щаублагъ. Iофтхьабзэр бэдзэогъум и 19 — 22-м кIощт. Ащ хэлэжьэщтхэр нэбгырэ 300 фэдиз мэхъух: анахь гуфэкIо чанхэр, волонтер организациехэм яIэшъхьэтетхэр, хэбзэ къулыкъухэу ахэм афэгъэзагъэхэм ялIы­кIохэр ыкIи нэмыкIхэр.

Форумым ипрограммэ къызыпкъырыкIырэр ыкIи ащ хэлажьэхэрэр зэзыпхыхэрэр «Мы — развитие региона» зыфиIорэ гупшысэр ары. Форумым къыдилъытэрэ гухэлъ шъхьаIэхэм ащыщыр шъолъыр пэпчъ ыкIи хэгъэгум зэрэпсаоу хэхъоныгъэ ашIынымкIэ программэм хэла­жьэхэрэм амалэу яIэхэр икъоу къыхэгъэщыгъэнхэр ары.

Форумым икъызэIухын фэ­гъэхьыгъэ мэфэкI Iофтхьабзэм хэлэжьагъ Адыгеим и ЛIышъхьэу КъумпIыл Мурат. Ар рагъэ­жьэным ыпэкIэ «Книги — Донбассу» зыфиIорэ Iофтхьабзэм республикэм и ЛIышъхьэ дыригъэштагъ ыкIи Донбасс нагъэсыным пае «Адыгеир: чIыопсыр, культурэр, шэн-хабзэхэр» зыфиIорэ тхылъыр аритыгъ.

Ащ нэужым КъумпIыл Мурат гуфакIохэм я Форум хэлэжьэрэ пстэуми шIуфэс къарихыгъ, Iофтхьабзэм изэхэщэнкIэ зи­шIуагъэ къэкIуагъэхэм — Рос­молодежым ыкIи Роспатриотцентрэм зэрафэразэр къыхи­гъэщыгъ.

«ЩыIэныгъэм чанэу хэлэ­жьэрэ ыкIи гумызагъэу щыт цIыфхэм сигуапэу сахэплъэ. Шъуащыщ пэпчъ ичIыпIэгъухэм апае макIэп ышIагъэр.

Шъо ныбжь зэфэшъхьаф шъуиI, лъэпкъ зэмылIэужыгъомэ шъуа­къыхэкIыгъ, ау зэкIэми шъузэзыпхырэр зы гухэлъ — цIыфхэм IэпыIэгъу шъуафэхъуныр ары. ШъуищысэхэмкIэ къэшъоу­шыхьаты сыд фэдэрэ къины­гъохэри шIумкIэ, зэдэIэпыIэжьныгъэмкIэ, зэфэгумэкIыгъэ­нымкIэ щыбгъэзыенхэ зэрэплъэ­кIыщтыр. Пандемием илъэхъэн гумэкIыгъуи волонтерствэр ары лъэшэу зишIуагъэ къэкIуагъэр, непи социальнэ лъэныкъом ар ищыкIэгъэ шъыпкъэу щыт», — къыхигъэщыгъ республикэм ипащэ.

Адыгеим и ЛIышъхьэ зэри­лъытэрэмкIэ, сымаджэхэм, зы­ныбжь хэкIотэгъэ шъхьэзакъо­хэм унаIэ атетыныр, колл-гуп­чэхэм Iоф ащыпшIэныр, культурнэ, спорт ыкIи общественнэ Iофтхьабзэхэм язэхэщэн ухэлэжьэныр, ошIэ-дэмышIагъэ зыхэлъ тхьамыкIэгъо чIыпIэ ифагъэхэм IэпыIэгъу ятыгъэныр — ахэр волонтерхэр ренэу зы­хэлэжьэхэрэ Iофыгъохэу щытых.

«ГуфакIохэм япчъагъэ хэгъэ­гум нахьыбэ зэрэщыхъурэм, общественнэ IофшIэным хэлажьэхэрэм къызэрахахъорэм тимыгъэгушIон тлъэкIырэп. Ти­республикэкIэ гуфакIохэм япчъа­гъэ ренэу хэхъо. Тэри ащ детэгъаштэ. Республикэм ящэ­нэрэ илъэс хъугъэу чанэу Iоф щешIэ гуфакIохэм я Гупчэу «Адыгеим иволонтерхэр» зыфиIорэм. Ащ хэхьэх кIэлэ­еджакIохэр, студентхэр, Iоф зышIэрэ ныбжьыкIэхэр ыкIи нэмыкIхэр. НепэкIэ ахэм япчъа­гъэ мин 77-м ехъугъ», — къы­Iуагъ КъумпIыл Мурат.

Адыгеим и ЛIышъхьэ къыхигъэщыгъ цIыф гумэкIылэхэр, гукIэгъу зыхэлъхэр зигъо Iофыгъохэу къэуцухэрэм язэшIо­хын епхыгъэ IофшIэным на­хьыбэу къыхэгъэлэжьэгъэнхэм мэхьанэшхо зэриIэр.

«Ти Президентэу Владимир Путиным къызэрэхигъэщыгъэмкIэ, общественнэ объединениехэм, мыкоммерческэ организациехэм яеплъыкIэхэр, игъоу алъэгъухэрэр къыдэлъытэгъэнхэм мэхьэнэ гъэнэфагъэ иIэу щыт. Лъэпкъ хэхъоныгъэмкIэ пшъэрылъхэм язэшIохын ахэр нахь фэгъэчэфыгъэнхэ фае. ГуфэкIо движением IэпыIэгъу ритыным ыкIи нахь зыригъэу­шъомбгъуным къэралыгъор фэ­хьазыр», — къыIуагъ респуб­ликэм и ЛIышъхьэ.

КъумпIыл Мурат къыхигъэщыгъ хэбзэ къулыкъухэмрэ граждан обществэмрэ язэгурыIоныгъэ нахь пытэнымкIэ, шъолъыр зэфэшъхьафхэм ащы­псэурэ гуфакIохэр яопыткIэ нахь игъэкIотыгъэу зэхъожьынхэмкIэ ащ фэдэ форумым мэхьанэшхо зэриIэр.

Адыгэ Республикэм и ЛIышъхьэ ипресс-къулыкъу

Сурэтхэр А. Гусевым тыри­хыгъэх.