Мыекъуапэ и Мафэ ихэгъэунэфыкIын епхыгъэ Iофтхьа­бзэхэм ягъэнэфэн ыкIи язэхэщэн фэгъэзэгъэ зэхэщэкIо комитетым изэхэсыгъо къэлэ администрацием щыкIуагъ.

Ащ пэщэныгъэ ды­зэрихьагъ Мыекъуапэ имэрэу Геннадий Мит­рофа­новым. Зэрагъэнэ­фагъэмкIэ, мыгъэ мэфэкIыр зыщыхагъэунэ­фыкIыщтыр Iо­ныгъом и 4-р ары.

— 2022-рэ илъэсым нахь пасэу къалэм и Ма­фэ хэдгъэунэфыкIыщт, Iоныгъом и 4-м. Арышъ, ткIуачIэ етхьылIэнышъ, лъэныкъо пстэури къы­дэтлъытэзэ, мэфэкI Iоф­тхьабзэхэр шэпхъэ лъагэм тетэу зэрэзэхэтщэщтхэр итхъухьанхэ фае. Джащ фэдэу чъэпыогъум рес­публикэр илъэс 31-рэ ыкIи Адыгеими къэралыгъо гъэпсыкIэ иIэ зыхъугъэр илъэси 100 зэрэхъухэрэр хэдгъэунэфыкIыщтых, — къыIуагъ Геннадий Митрофановым.

Ныбжь зэфэшъхьафхэм атегъэпсыхьагъэу, Iоф­тхьэбзэ зэфэшъхьафхэр Iоныгъом и 2-м къыще­гъэжьагъэу къалэм щы­зэ­хащэщтых. Бэмэ агу рихьы хъугъэ мэфэкI Iоф­тхьабзэхэу декоративнэ­-IэрышI творчествэм иIэпэIасэхэм, чIыпIэ гъо­мылапхъэхэр къыдэзыгъэ­кIыхэрэм якъэгъэлъэгъонхэр, кIэлэцIыкIу курэжъыехэм, самокатхэм ыкIи лъэкъуищ зыкIэт кушъхьэфачъэхэм япарад, нэ­мыкIхэри зэхэщакIохэм планым хагъэхьагъэх. Спорт зэнэкъокъухэмкIэ, творческэ купхэм якъэ­гъэлъэгъонхэмкIэ мэфэкI программэр баищт.

— Адыгеир зыщыIэр илъэси 100 зэрэхъурэм инэшанэ къэлэ шъхьаIэм и Мафэ ихэгъэунэфыкIын къыщыхэщыщт. ГущыIэм пае, Iофтхьабзэу «СТОличный маршрут» зыфи­Iорэм къыдыхэлъытагъэу Адыгеир илъэсишъэ зэрэ­хъурэм тефэу нэбгыри 100 фэдиз зекIо гъогум техьанхэ алъэкIыщт. Сурэттех­хэм язэнэкъокъоу «СТО лиц в объективе» зыфиIо­рэри гъэшIэгъонэу рагъэ­кIокIыщт. Ащ икIэуххэр ыкIи текIоныгъэ къыдэзы­хыгъэхэр Iоныгъом и 4-м къэнэфэщтых, — къытыгъ Мыекъопэ къэлэ администрацием ипресс-къу­лыкъу.