МэфэкIым зыфагъэхьазыры
Хэкум къэзыгъэзэжьыгъэм и Мафэ шышъхьэIум и I-м игъэкIотыгъэу Мыекъуапэ щыхагъэунэфыкIыщт.
Адыгэ Республикэм лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет мэфэкIым изэхэщэкIо куп хэтхэр щызэIукIагъэх.
Комитетым итхьаматэу Шъхьэлэхъо Аскэр зэхахьэм хэлажьэхэрэр Iофтхьабзэр зэрэкIощт шIыкIэм щигъэгъозагъэх. Адыгеим ихэбзэ къулыкъушIэхэр, общественнэ организациехэм ялIыкIохэр, хэкум къэзыгъэзэжьыгъэхэр, нэмыкIхэри зэIукIэгъум хэлэжьэщтых. Республикэм иансамблэхэм, орэдыIохэм концертыр къатыщт.
Республикэм культурэмкIэ иминистрэ игуадзэу Кушъу Светланэ, АР-м и Къэралыгъо филармоние ипащэу Къулэ Мыхьамэт, республикэ общественнэ движениеу «Адыгэ Хасэм» итхьаматэу ЛIымыщэкъо Рэмэзан, Адыгэ Хасэм игъэцэкIэкIо куп хэтхэу ГъукIэлI Сусанэ, Хъот Юныс, Адыгеим лъэпкъ культурэмкIэ и Гупчэ ипащэу Бадый Къэплъан, АР-м и Къэралыгъо IофшIапIэу хэкум къэзыгъэзэжьыгъэхэр егъэсэжьыгъэнхэмкIэ Гупчэм ипащэу ГъукIэлI Асхьад, Комитетым икъулыкъушIэхэу Мурэдэ ГощэлъапIэ, Амурэ Рузанэ зэхахьэм къыщыгущыIагъэх.
ЯеплъыкIэхэм анахьэу къащыхагъэщыгъэр хэкум къэзыгъэзэжьыгъэ тилъэпкъэгъухэм концертыр дэгъоу афызэхащэ зэрашIоигъор ары. Республикэм ичIыпIэрысхэмрэ яхэку къэзыгъэзэжьыгъэхэмрэ мэфэкIым щызэIуагъэкIэщтых, ягушIуагъо зэдагощыным Iофтхьабзэр фагъэIорышIэщт.
ЗыкIыныгъэмрэ ЗэгурыIоныгъэмрэ ясаугъэтэу филармонием дэжь щытым ипчэгу мэфэкI зэхахьэр щыкIонэу пэшIорыгъэшъэу рахъухьагъ. Пчыхьэзэхахьэр адыгэ джэгукIэ аухыщт.
Сахьидэкъо Нурбый.