Лъэпкъ проектэу «Псауныгъэр къэухъумэгъэным» ишъолъыр проек­тэу «Адэбз узхэм апэшIуекIогъэныр» зыфиIорэм хахьэу Адыгэ республикэ клиническэ онкологическэ диспансерэу М. А. Iэшъхьэмафэм ыцIэ зыхьырэм сомэ миллион 70-рэ зыосэ компьютернэ томограф мы мэфэ благъэхэм къыфащэщт. Iэмэ-псымэр IэзэпIэ-диагностическэ диспансерым чIагъэуцощт.

— Компьютернэ томографым ишIуагъэкIэ диспансерым испе­циалистхэм медицинэ уплъэ­кIун къинхэр ашIыщтых, ащ дакIоу узыр гъэунэфыгъэным уахътэу текIодэщтыр нахь мэкIэщт ыкIи компьютернэ то­мографие ашIынымкIэ чэзыум хэтхэм япчъагъэ къыщыкIэщт, — къыIуагъ адэбз узхэм зыщяIэзэхэрэ республикэ диспансерым иврач шъхьаIэу АкIэгъу Заур.

Мы илъэсым программэу «Адэбз узхэм апэшIуекIогъэныр» зыфиIорэм хахьэу адэбз узхэм зыщяIэзэхэрэ республикэ диспансерым изэтегъэпсыхьан сомэ миллиони 117,7-рэ пэIуагъэхьагъ. Медицинэ Iэмэ-псымэ 18 фэдиз къащэфыгъ.