Амыгъэкощырэ мылъкум хэхьэрэ псэуалъэхэу ыпэкIэ учетым хэтыгъэхэр зиехэр (ахэмкIэ фитыныгъэ зиIэхэр) гъэунэфыгъэнхэмкIэ къы­зыфагъэфедэрэ Федеральнэ законэу N 518-р зытетыр гъэцэкIагъэ хъуным пае Росреестрэм Адыгэ РеспубликэмкIэ и Гъэ­IорышIапIэ чIыпIэ зыгъэIорышIэжьынымкIэ къу­лыкъухэм апае Iофтхьэбзэ заулэ зэхищагъ.

Ахэм ахэлэжьагъэх Кадастрэ палатэм, ФНС-м Адыгэ Рес­публикэмкIэ и ГъэIорышIапIэ, Адыгэ Республикэм чIыпIэ зы­гъэIорышIэнымкIэ икъулыкъухэм адэлэжьэгъэным фэгъэзэгъэ Комитетым ялIыкIохэр.

Мэкъуогъум и 30-м къыщыублагъэу бэдзэогъум и 5-м нэс Росреестрэм Адыгэ Респуб­ликэмкIэ и ГъэIорышIапIэрэ Кадастрэ палатэмрэ ыпэкIэ зигугъу къэтшIыгъэ Комитетыр ягъусэу зэIукIэ заулэ зэхащагъ ащ фэдэ фитыныгъэ зиIэхэр къыхэгъэщыгъэнхэмкIэ ыкIи Къэралыгъо реестрэ зыкIым ахэр хэгъэхьэгъэнхэмкIэ. 2022-рэ илъэсым бэдзэогъум и 5-м Адыгэкъалэ кIэух зэIукIэр щыкIуагъ.

ГъэIорышIапIэм ипащэу Марина Никифоровам къызэриIуа­гъэмкIэ, Адыгеим мы лъэхъаным амыгъэкощырэ мылъкум хэхьэ­рэ, зиер амыгъэунэфыгъэ псэуа­лъэу 121799-рэ къыщалъытэ. Федеральнэ законэу аштагъэм щэгугъых а Iофыр нахь кIэ­кIынымкIэ ишIуагъэ къэкIонэу. Уп­чIэ горэхэр къэуцухэми, ишIуагъэ аригъэкIыным Гъэ­IорышIапIэр фэхьазыр.

РеспубликэмкIэ Кадастрэ палатэм итхьаматэу ХъокIо Аюбэ къызэрэхигъэщыгъэмкIэ, ЕГРН-м итхэр тэрэзэу, икъоу гъэпсыгъэнхэм республикэм исоциальнэ-экономикэ хэхъоныгъэкIи мэхьанэ иIэу щыт, инвестициехэмкIи амал дэгъухэр ащ къытыщтых.

Адыгэ Республикэм и Ко­ми­тетэу чIыпIэ зыгъэIорышIэ­жьы­ным икъулыкъухэм адэлажьэрэм и Тхьаматэ игуадзэу Долэ Долэтбый анаIэ тыраригъэдзагъ фитыныгъэ зиIэхэм якъыхэгъэщынкIэ Законыр гъэцэкIагъэ хъуным епхыгъэу пшъэдэкIыжь зыхьырэ пстэуми акIуачIэ зэдырахьылIэн зэрэфаем.

Росреестрэм АР-мкIэ и ГъэIорышIапIэ къыщагъэхьазырыгъ .