Адыгэ Республикэм и Къэралыгъо академическэ къэшъо­кIо ансамблэу «Налмэсыр» искусствэхэмкIэ Дунэе фестив­а­лэу «Славянский базар» зыфиIорэм хэлэжьагъ.

— Белоруссием икъалэу Витебскэ щыкIогъэ Дунэе фестивалыр дахэу зэхащагъ, — къытиIуагъ «Налмэсым» ихудожественнэ пащэу, Урысыем, Абхъазым, Пшызэ язаслуженнэ артистэу, Адыгеим инароднэ артистэу Хъоджэе Аслъан. — Лъэпкъ искусствэм хэхъоныгъэ зэришIырэр творческэ купхэм узыIэпищэу къагъэлъэгъуагъ.

Дунэе фестивалым ихэушъхьафыкIыгъэ «Гала концерт» зыфиIорэм Башкирием, Татарстан, Чэчэным, Ставрополь краим, Белоруссием, Адыгеим, нэмыкI­хэм яансамблэхэр хэлэжьагъэх. ЗэхэщакIохэр къызэрэкIэлъэIугъэхэм фэшI адыгэу IэкIыб къэралхэм ащыпсэухэрэм якъэшъо зэхэт «Налмэсым» къышIыгъ. Нэбгырэ мини 6 зычIэсыгъэ залым тиартистхэр щагъэлъэпIагъэх, лъэшэу Iэгу къафытеуагъэх.

«Налмэсыр» дунэе культурэм щашIэ, осэ ин къыщыфашIы. Опсэу, тилъапIэу «Налмэсыр»! Къэралыгъо гъэпсыкIэ иIэу Адыгеир зыпсэурэр илъэси 100 зэрэхъурэм фэгъэхьыгъэ Iофтхьабзэхэм чанэу уахэлэжьэнэу зыогъэхьазыры. Уигъэхъагъэхэм ахэбгъэхъонэу, Адыгэ Республикэм ищытхъу нахь лъагэу пIэтынэу пфэтэIо! ЕмтIылъ Нурбый.