Адыгэ къэралыгъо университетым илIыкIохэр мы мафэ­хэм Лъэпкъ ушэтыпIэ гупчэу «Курчатовский институт» зыфиIорэм щыIагъэх. Ректорэу Мамый Даутэ купым ипэщагъ.

Курчатовскэ институтым ипрезидентэу Михаил Ковальчук къыригъэблэгъагъэхэм научнэ базэу яIэр, гъэсэныгъэмкIэ икIи шIэныгъэмкIэ институтым иIофшIэн зэрэзэхищэрэр аригъэлъэгъугъ. Лабораториехэр, ушэтынымкIэ гупчэхэр ыкIи нэмыкIхэр къаригъэплъыхьагъэх.

Курчатовскэ институтым ушэтын-технологи­ческэ базэ дэгъу иI. Джы­рэ шIэныгъэхэм ыкIи тех­нологиехэм япхыгъэу, энергетикэм къыщегъэ­жьагъэу конвергентнэ НБИКС-технологиехэм ыкIи физикэм, медицинэм ыкIи къэбарлъыгъэIэс тех­нологиехэм анэсэу IофшIэнхэр, ушэтынхэр щашIых.

Генетикэм, къэбарлъыгъэIэс ыкIи компьютер технологиехэм, культурнэ кIэным иджырэ ушэ­тыпIэ шIыкIэхэм афэгъэ­хьыгъэ Iофыгъохэм атегущыIагъэх.

— Курчатовскэ институтым иопыт дгъэфе­дэным тэркIэ мэхьанэшхо иI, тызэдэлэжьэнымкIэ амал дэгъухэр тиIэх. Лъэ­ныкъо зэфэшъхьафхэмкIэ тызэгъусэу ушэтынхэр тшIыщтых, генетикэм фэгъэхьыгъэ проектхэр, къэ­кIыхэрэм, цIыфым, им­муногенетикэм япхыгъэ проектхэр дгъэхьазырыщтых. Курчатовскэ ин­ститутымрэ еджапIэмрэ шIугъэ къытэу Iоф зэда­шIэным тыпылъ. ШIэны­гъэу, опытэу тIэкIэлъымкIэ тызэдэгощэн амал тиI. Тистудентхэр ыкIи кIэлэ­егъаджэхэр Курчатовскэ институтым кIощтых, ежьхэри тиапшъэрэ еджапIэ къеблэгъэнхэу зэзэгъы­ныгъэ зэдэтшIыгъ, — къы­Iуагъ Мамый Даутэ.

Курчатовскэ институтым ипрезидентэу Михаил Ковальчук ушэтынхэмкIэ фундаментальнэ Урысые фондым исовет ипащэу Владислав Панченкэр игъусэу бэмышIэу АР-м и ЛIышъхьэу КъумпIыл Мурат къыригъэблагъэхи Адыгеим щыIагъэх. Адыгэ къэралыгъо университетым иректорэу Мамый Даутэ, Мыекъопэ къэралыгъо технологическэ уни­верситетым иректорэу Къуижъ Саидэ заIуагъэ­кIагъ. Республикэм ит апшъэрэ еджапIэхэм Iоф зэрашIэрэр къафаIотагъ.