ХьисапымкIэ шIэныгъэхэм ахагъахъо
Адыгэ къэралыгъо университетым и Кавказ хьисап еджапIэ комбинаторикэм ыкIи джэгукIэхэм ятеорие епхыгъэ яя V-рэ еджапIэ мы мафэхэм зэхащагъ.
Профильнэ лагерым студентхэр, магистрэхэр ыкIи шIэныгъэлэжь ныбжьыкIэхэр хэлэжьагъэх. Ахэр хэгъэгум ишъолъыр зэфэшъхьафхэм, Сербием, Армением къарыкIыгъэх. Ахэтых АКъУ-м, МГУ-м, ВШЭ-м, МФТИ-м ыкIи нэмыкI апшъэрэ еджапIэхэм ащеджэхэрэр.
Iофтхьабзэр базэу «Горный гонщик» зыфиIорэм щызэхащагъ. Очнэу ыкIи пэIудзыгъэ шIыкIэм тетэу егъэджэнхэр рагъэкIокIыгъэх.
Программэм къыдыхэлъытагъэу комбинаторикэм ыкIи джэгукIэхэм ятеорие фэгъэхьыгъэ лекциехэр, практическэ ыкIи творческэ IофшIэнхэр, мастер-классхэр ыкIи тренингхэр зэхащагъэх. Ащ ахэлэжьагъэх хьисап факультетым имагистрэхэмрэ истудентхэмрэ.
Егъэджэнхэм ямызакъоу ныбжьыкIэхэм Iофтхьэбзэ зэфэшъхьафхэр афызэхащагъэх, зекIо ащагъэх.
Мы Iофтхьабзэр 2018-рэ илъэсым къыщегъэжьагъэу рагъэкIокIы. КIэлэеджакIохэм ыкIи студентхэм хьисапымкIэ шIэныгъэу аIэкIэлъхэм ахагъэхъоныр ары пшъэрылъ шъхьаIэу зэхэщакIохэм яIэр.