Адыгэ Республикэм и ЛIышъхьэ и Ситуационнэ гупчэ зэIукIэу щыкIуагъэр зыфэгъэхьыгъагъэр «КIэлэцIыкIу ибэхэм ыкIи ны-тыхэр зышъхьарымытыжьхэм зычIэсыщтхэ унэхэр ягъэгъотыгъэнхэмкIэ Iофтхьабзэхэм ягъэцэкIэн» зыфиIорэ Iофыгъор ары. Адыгеим и ЛIышъхьэу КъумпIыл Мурат ар зэрищагъ.

Iофыгъом итегущыIэн хэлэжьагъэх министерствэхэм ыкIи ведомствэхэм яIэшъхьэтетхэр, республикэм имуниципалитетхэм япащэхэр. Псэлъэ шъхьаIэр къэзышIыгъэр Адыгэ Республикэм псэолъэшIынымкIэ, транспортымкIэ, ЖК-мкIэ ыкIи гъогу хъызмэтымкIэ иминистрэу Валерий Картамышевыр ары.

Адыгэ Республикэм псэолъэшIынымкIэ и Министерствэ къызэритыгъэмкIэ, мы илъэсым зыныбжь илъэс 18-м нэсы­гъэ кIэлэцIыкIу ибэ 401-мэ зычIэсыщтхэ унэ арагъэгъотыным ифитыныгъэ яI. 2022-рэ илъэсым программэм сомэ миллиони 117,7-рэ пэIухьащт, ащ щыщэу сомэ миллиони 100-р республикэ бюджетым къыхагъэкIыщт, сомэ миллион 17,7-р федеральнэ бюджетым къи­кIыщт. Ащ нэмыкIэу республикэ бюджетым сомэ миллиони 5 ахъщэ тедзэу къыхагъэкIыщт. А мылъкур зэкIэ зыпэ­Iухьащтыр кIэлэцIыкIу ибэ 95-мэ зычIэ­сыщтхэ унэхэу аIэкIагъэхьащтхэр ары.

Нэужым чIыпIэхэм программэр гъэцэкIагъэ зэращыхъурэм фэгъэхьыгъэу къаIотагъ къалэхэмрэ районхэмрэ яIэшъхьэтетхэм. Ахэм зэрэхагъэунэфыкIыгъэмкIэ, бэдзэр уасэу унэхэм яIэм зэрэхахъорэм Iофыгъошхо къыпэкIы. НепэкIэ фэтэр 43-рэ къащэфыгъ, Шэ­уджэн районым фэтэр 24-рэ зыхэхьэрэ унэм ишIын щэкIо.

КIэуххэр зэфихьысыжьхэзэ респуб­ликэм и ЛIышъхьэ къызэрэхигъэщыгъэм­кIэ, пэрыохъу горэхэр щыIэхэми, икъоу социальнэ пшъэрылъхэр шъолъырым гъэцэкIагъэ щыхъунхэм тишъыпкъэу ты­дэлэжьэн фае.

«Муниципалитетхэм япащэхэр, район гупчэхэмрэ цIыф псэупIэ инхэмрэ нахь чанэу псэолъэшIыныр ащызэхашъущ. Инфраструктурэ зиIэ чIыгу Iахьхэр къа­фыхэжъугъэкIых, унэхэр зышIыщтхэри джащыгъум къэкIощтых. ПэшIорыгъэ­шъэу фэтэрхэр къызIэкIэгъэхьэгъэнхэм фэгъэ­хьыгъэ зэзэгъыныгъэхэр адэшъушIых. Социальнэ лъэныкъомкIэ программэ заулэ тэгъэ­цакIэ: сабыибэ зэрыс унагъохэм, къуа­джэхэм Iоф ащызышIэрэ специалистхэм, зэхэтэкъоным нэсыгъэ унэ­хэм къачIащыхэрэм зыщыпсэущтхэр аIэкIэгъэхьэгъэнхэ фае. Унэу дгъэ­псыхэрэр ящыкIэгъэщтых», — къы­Iуагъ КъумпIыл Мурат.

Генеральнэ планым тетэу унэхэр ашIынхэу, микрорайоныкIэхэм социальнэ псэуалъэхэр ащагъэуцунхэу республикэм и ЛIышъхьэ пшъэрылъ къыгъэуцугъ.

АР-м и ЛIышъхьэ ипресс-къулыкъу