ФедерациемкIэ Советым шIэныгъэмкIэ, гъэсэныгъэмкIэ ыкIи культурэмкIэ и Комитет изэхэсыгъо Адыгэ Республикэм и Лъэпкъ тхылъеджапIэрэ АР-м и Къэралыгъо филармониерэ ягъэцэкIэжьын ыкIи язэтегъэпсыхьан епхыгъэ Iофыгъохэм щытегущыIагъэх.

Адыгеим культурэмкIэ иминистрэу Аулъэ Юрэ къызэриIуа­гъэмкIэ, документхэм яэкземпляр мин 545-м ехъу зычIэлъ Лъэпкъ тхылъеджапIэр чIыпIэ­хэм ащэкIэ. Шапхъэу щыIэхэмкIэ ащ квадрат метрэ 5450-м нахь мымакIэу ыубытын фае, джырэ уахътэм ар квадрат метрэ 2176-рэ мэхъу.

Джащ фэдэу АР-м и Къэралыгъо филармоние къызызэIуа­хыгъэм щегъэжьагъэу игъэкIотыгъэу агъэцэкIэжьыгъэп. Мы проектхэр республикэм щызэшIохыгъэнхэм пае федеральнэ IэпыIэгъу ищыкIагъ.

Къэралыгъо программэхэм ыкIи лъэпкъ проектхэм яшIуагъэкIэ, мы аужырэ илъэситфым Адыгеим культурэм и Уни 5 щашIыгъ, 31-мэ игъэкIотыгъэ гъэцэкIэжьынхэр ащыкIуагъэх, зы мунищипальнэ музей зэтырагъэпсыхьагъ, модельнэ тхылъеджэпIэ 11 агъэпсыгъ. Илъэсым ыкIэм ехъулIэу я 12-рэ мыщ фэдэ тхылъеджапIэ къызэIуахын агу хэлъ, кинозали 8 агъэ­кIэ­жьыгъ, искусствэхэмкIэ кIэлэцIыкIу еджэпIи 7-мэ гъэцэкIэ­жьынхэр ащыкIуагъэх. 2022-рэ илъэсым телъытагъэу культурэм и Уни 3 ашIы, культурэм иучреждении 9-мэ ыкIи искусствэхэмкIэ кIэлэцIыкIу еджэпIи 2-мэ гъэцэкIэжьынхэр ара­шIылIагъэх. Мы лъэныкъомкIэ щыIэ инфраструктурэр нахьышIу шIыгъэным епхыгъэ IофшIэнхэр лъагъэкIотэщтых.