ФедерациемкIэ Советым социальнэ политикэмкIэ изэхэсыгъо Iофыгъо шъхьаIэу къыщаIэтыгъэхэм ащыщ Мыекъопэ къэлэ клиническэ сымэджэщым приемнэ отделениер зыхэт хирургическэ корпусыкIэ ыкIи сэкъатныгъэ зиIэ цIыфхэм IэпыIэгъу афэхъугъэным фытегъэпсыхьэгъэ реабилитационнэ гупчэ щыгъэпсыгъэнхэр.

Адыгэ Республикэм псауныгъэр къэухъумэгъэнымкIэ иминистрэу Мэрэтыкъо Рустем къызэриIуагъэмкIэ, федеральнэ гупчэм иIэпыIэгъукIэ мы аужырэ илъэси 5-м медицинэ псэолъэ 40 ашIыгъ, 2 зэтырагъэ­псыхьагъ, 11-мэ игъэкIотыгъэ гъэцэкIэжьынхэр ащыкIуагъэх, 3 къащэфыгъ. Ау джыри щыIэх гъэцэкIэжьын зищыкIэгъэ псэуалъэхэр.

Ахэм зэу ащыщ Мыекъопэ къэлэ клиническэ сымэджэщыр. Мыщ дыхэт хирургическэ унэу жъы хъугъэм пандемием илъэ­хъан инфекционнэ сымэджэщ къыщызэIуахыгъагъ, ыпэкIи ар Iэзэн IофхэмкIэ къызфагъэфедэщтыгъ. Ащ къыхэкIыкIэ чIыпIи 150-рэ зиIэщт хирургическэ унакIэм ишIын епхыгъэ проект-сметэ документациер агъэ­хьазырыгъ. Ащ хэхьащтых хирургиер, гинекологиер, анестезиологиер, реанимациер, диагностическэ къулыкъухэр, нэмыкIхэри. РеспубликэмкIэ мы псэуалъэм социальнэ мэхьанэшхо зэриIэм къыхэкIэу ащ ишIын пэIухьащ мылъкумкIэ сенаторхэм яшIуагъэ къагъэкIонэу ащэгугъых.

Сэкъатныгъэ зиIэ цIыфхэм IэпыIэгъу афэхъугъэным иIофыгъуи зэхэсыгъом къыщаIэтыгъ. КъызэраIуагъэмкIэ, мы аужырэ илъэситфым реабилитацием фэIорышIэрэ унэе программэ мин 57-рэ фэдиз зэхагъэуцуагъ. Мы купым хахьэхэрэм яфэIо-фашIэхэр зэрифэшъуашэу гъэцэкIэгъэнхэм фэшI зэхэубытэгъэ реабилитационнэ гупчэм ишIын мэхьанэшхо иI. АР-м IофшIэнымкIэ ыкIи социальнэ хэхъоныгъэмкIэ иминистрэу Мырзэ Джанбэч къызэриIуагъэмкIэ, мыщ фытегъэпсыхьэгъэ проект-сметэ документациер агъэ­хьазырыгъ. Проектым отделении 5 къыделъытэ, ащ хэхьэ чIыпIи 100 зиIэщт амбулаториери. Пшъэрылъыр гъэцэкIэгъэным сомэ миллион 600 фэдиз ищыкIэгъэщт.