Адыгеим и ЛIышъхьэу КъумпIыл Мурат селоу Вольнэмрэ къутырэу Казеннэ-Кужорскэмрэ ащыIагъ.

Программэу «Къуаджэхэм хэхъоныгъэ ягъэшIыгъэныр» зыфиIорэм тегъэпсыхьагъэу спортивнэ комплексхэм яшIын ахэм ащаублагъ. Iофтхьабзэм хэлэжьагъэх федеральнэ инспектор шъхьаIэу Сергей Дрокиныр, Адыгэ Республикэм и ЛIышъхьэрэ Адыгэ Республикэм иминистрэхэм я Кабинетрэ я Администрацие ипащэ игуадзэу Къонэ Заур, Адыгеим мэкъу-мэщымкIэ иминистрэу Къуанэ Анзаур, республикэм физическэ культурэмкIэ ыкIи спортымкIэ и Комитет итхьаматэ игуадзэу Андрей Бородиныр, Кощхьэблэ районым ипащэу Хьамырзэ Заур.

ПсэолъэшIынхэр зэрэкIохэрэм фэгъэхьыгъэу къаIотагъ подряднэ организациехэу ООО-у «СИМ-Строй» ыкIи ООО-у «Нова Рем-Строй» зыфиIохэрэм япащэхэм. Селоу Вольнэм проектым къызэрэдилъытэрэм тетэу квадрат метрэ 836-рэ хъущт унэу тIоу зэтетыщтыр щашIыщт. Ащ физическэ ухьазырыныгъэм фытегъэпсыхьэгъэ залитIу хэтыщт: зыр – квадрат метрэ 362-рэ, адрэр – квадрат метрэ 209-рэ хъущтых. Джащ фэдэу зызщатIэкIыщт, зызщагъэпскIыщт, медицинэ фэIо-фашIэхэр зыщызэшIуахыщтхэ кабинетхэр, административнэ унэхэр хэтыщтых. Псэуа­лъэм сомэ миллион 54-рэ тефэщт. Ащ нэмыкIэу сомэ мил­лионым ехъу зыосэ оборудованиер къащэфыгъ.

НепэкIэ техническэ лъэныкъомкIэ процент 25-у псэуа­лъэр хьазыр: лъапсэр агъэтIы­лъыгъах, унэ бгыкъухэр агъэуцугъэх. Коммуникациехэм яп­хыгъэ IофшIэнхэр рагъэжьэщтых. Джащ фэдэу унэ кIоцI дэпкъхэр агъэ­лэщтых. Мы илъэсым ыкIэм ехъулIэу IофшIэнхэр аухынхэу ары зэрэгугъэхэрэр.

Адыгеим и ЛIышъхьэ къутырэу Казеннэ-Кужорскэм спорткомплексым ишIын зэрэщыкIорэм нэIуасэ зыфишIыгъ. Проектым къызэрэдилъытэрэмкIэ, квадрат метрэ 432,4-рэ зыубытыщт спортивнэ зал хэтыщт, джащ фэдэу зызщатIэ­кIыщт, Iэмэ-псымэхэр зэры­лъыщтхэ, зызщагъэпскIыщт ыкIи санузлэхэр хэтыщтых. ЗипсауныгъэкIэ пыч зиIэ цIыф купхэм мы спорткомплексыр къызфагъэфедэным пае ищыкIэгъэ оборудованиер чIагъэуцощт. Унэ лъапсэм ишIын епхыгъэ Iофыгъохэр агъэцэкIагъэх, псыр зэ­рыкIощт трубэхэр унэм къыращэлIагъэх. Сомэ миллион 0,5-рэ фэдиз оборудованием тефагъ. Мы илъэсым ыкIэм ехъулIэу сомэ миллион 22-м ехъу зытефэгъэ проектыр агъэ­цэкIэнэу ары.

Республикэм и ЛIышъхьэ районымрэ спорт комитетымрэ япащэхэм пшъэрылъ афишIыгъ псауныгъэм игъэпытэн фытегъэ­псыхьэгъэ псэуалъэхэм къапэ­Iулъ чIыпIэр дэгъоу зэтегъэ­псыхьагъэ хъуным анаIэ тырагъэтынэу, тэрэзэу къэнэфынхэу ыкIи а чIыпIэхэм чъыг-къэгъагъэхэр нахьыбэу ащагъэтIыс­хьанхэу ариIуагъ.

«Непэ цIыфхэр жъугъэу зыхэлэжьэхэрэ спортым зиушъомбгъунымкIэ республикэм бэ щашIэрэр. КъыткIэхъухьэхэрэр псаунхэу тыфай. Урысыем и Президентэу Владимир Путиным физкультурэмрэ спортымрэ хэхъоныгъэ ягъэшIыгъэным ылъэныкъокIэ пшъэрылъышхохэр къыгъэуцугъэх. Ащ фэдэ спортивнэ комплексыкIэ тиIэ хъу къэс пшъэрылъхэу ащ къыгъэуцугъэхэм ягъэцэкIэн зы лъэбэ­къукIэ нахь пэблагъэ тэхъу. Республикэм исхэмкIэ щыIэкIэ-псэукIэ тэрэзым игупчэу спортивнэ псэуалъэхэр зэкIэ хъунхэм тынаIэ тедгъэтын фае», — къыIуагъ КъумпIыл Мурат.

АР-м и ЛIышъхьэ ипресс-къулыкъу