Адыгэ Республикэм и ЛIышъхьэу КъумпIыл Мурат Кощхьэблэ районым зыщэIэм къэралыгъо программэу «Къуаджэхэм хэхъоныгъэ ягъэшIыгъэныр» зыфиIорэм тегъэпсыхьагъэу ашIырэ псэолъэ заулэмэ язытет нэIуасэ зыфишIыгъ.

Iофтхьабзэм хэлэжьагъэх федеральнэ инспектор шъхьаIэу Сергей Дрокиныр, Адыгэ Рес­публикэм и ЛIышъхьэрэ Адыгэ Республикэм иминистрэхэм я Кабинетрэ я Администрацие ипащэ игуадзэу Къонэ Заур, республикэм мэкъу-мэщымкIэ иминистрэу Къуанэ Анзаур, Адыгеим псауныгъэр къэухъу­мэгъэнымкIэ иминистрэу Мэрэтыкъо Рустем, Кощхьэблэ районым ипащэу Хьамырзэ Заур.

Программэм тегъэпсыхьа­гъэу агъэпсыхэрэм ащыщых врач амбулаториитIур. Ахэр псэупIэ­хэу Вольнэмрэ Майскэмрэ ащашIых. УнитIури дэгъоу зэтегъэпсыхьэгъэщтых. Техникэм ылъэныкъокIэ псэолъитIури процент 30-м шIокIэу хьазырых. ЫкIыбкIэ унэр зэтыралъхьэгъах, гъучI-бетон зэпыутыпIэхэр ашIыгъэх, унашъхьэм пае конструкцием игъэхьазырын макIо. Сомэ миллиони 8 фэдиз атефагъ амбулаториитIумэ апае оборудованиеу къащэфыгъэм.

Республикэм и ЛIышъхьэ псэуалъэ пэпчъ Iофхэр зэрэщыкIохэрэр зэригъэлъэгъугъ, подряднэ организациехэм япащэхэм гущыIэгъу афэхъугъ, IофшIэнхэр игъом гъэцэкIагъэ хъунхэм пае ищыкIэгъэ Iоф­тхьабзэхэу зэрахьан фаехэр къафигъэнэфагъэх. Псауныгъэр къэухъумэгъэнымкIэ Министерствэмрэ муниципалитетымрэ псэолъэшIыныр игъом ухыгъэным ыкIи дэгъоу шIыгъэнхэм анаIэ лъэшэу тырагъэтынэу пшъэрылъ афишIыгъ.

Адыгэ Республикэм псауныгъэр къэухъумэгъэнымкIэ иминистрэ къызэриIуагъэмкIэ, илъэсэу тызыхэтым ыкIэм ехъулIэу псэуалъэхэр аухыщтых. Медицинэ учреждениехэм цIыфхэм ядиспансеризацие ыкIи поликлиническэ фэIо-фашIэхэр зэшIуахыщтых. Ащ нэмыкIэу зыфэныкъо врачхэм цIыфхэр яолIэнхэ зыщалъэкIыщт мафэхэр агъэнэфэщтых. Амбулаторнэ фэIо-фашIэхэм къахиубытэщтхэр Вольнэмрэ Майскэмрэ адэс закъохэр арэп, ахэм къапэблэгъэ псэупIэхэм адэсхэми а фэIо-фашIэхэр къызфагъэфедэнхэ алъэкIыщт.

Адыгеим и ЛIышъхьэу КъумпIыл Мурат къызэрэхигъэщы­гъэмкIэ, псауныгъэм икъэухъу­мэнкIэ медицинэм икъулыкъу­хэм яIофшIэн нахьышIоу зэ­хэщэгъэ­ным пае хэгъэгум ипа­щэхэм шъолъырхэм пшъэ­рылъышхохэр къафашIых. Ахэр зэшIохыгъэ хъунхэм пае лъэпкъ проектымрэ къэралыгъо программэхэмрэ къыдалъытэхэрэр зэкIэ агъэфе­дэх. ГущыIэм пае, республикэм поликлиникэхэр щашIых ыкIи щагъэцэкIэжьых, мы илъэсым врач амбулатории 4 ыкIи фельдшер-мамыку IэзэпIи 3 а зы пIалъэм ашIынэу рагъэжьагъ.

Ахэм анэмыкIэу программэ зэфэшъхьафхэм зэрахэлажьэ­хэрэм ишIуагъэкIэ псауныгъэм икъэухъумэн фэгъэзэгъэ учреждениехэу Кощхьэблэ районым итхэр гъэцэкIэжьыгъэ хъу­гъэх. Мы илъэсым джыри амбулаториитIу ашIыщт, къыкIэ­лъыкIорэ илъэсым псэупIэу Дружбэм зы амбулаторие щагъэпсыщт. Ащ нэмыкIэу Кощ­хьэблэ районым икъутыритIу — Игнатьевскэмрэ Красный Фарсрэ фельдшер-мамыку IэзэпIитIу ащышIыгъэным пае проект-сметэ документациер агъэхьазыры.

«Урысые Федерацием и Президентэу Владимир Путиным цIыфхэм ямедицинэ фэIо-фа­шIэхэр дэгъоу гъэцэкIэгъэнхэм, пэублэ звенэкIэ заджэхэрэм иIофшIэн нахь тэрэзэу зэхэщагъэ хъуным япхыгъэ пшъэ­рылъхэр къыгъэуцугъэх. Сымэджэщхэм, амбулаториехэм ыкIи фельдшер-мамыку IэзапIэхэм ащызэшIуахыхэрэ Iоф­тхьабзэхэм яшIуагъэкIэ псынкIэу ыкIи дэгъоу сымаджэхэм яIэзэнхэ алъэкIыным иамал щыIэ хъущт. Ар зидунай зыхъожьыхэрэм япчъагъэ нахь къыкIичыным, цIыфхэм япсауныгъэ изытет нахьышIу шIыгъэным япхыгъэ шъыпкъэу щыт», — къыхигъэ­щыгъ КъумпIыл Мурат.

ИкIэухым Адыгэ Республикэм и ЛIышъхьэ къуаджэхэм кадрэ ныбжьыкIэхэр нахьыбэу къаращэлIэнхэу пшъэрылъ къыгъэуцугъ. МыщкIэ программэу «Зем­ский доктор» зыфиIорэр ыкIи нэмыкI проектхэу специалист ныбжьыкIэхэм ыкIи сабыйхэр зиIэ унагъохэм IэпыIэгъу ятыгъэным фытегъэпсыхьагъэхэр къызфагъэфедэнхэ алъэ­кIыщт.